Romada 27 Sentyabr - Anım Gününə həsr olunmuş tədbir keçirilib VİDEO
Roma, 26 sentyabr, AZƏRTAC
Azərbaycanın İtaliyadakı səfirliyinin və səfirliyin tabeliyində fəaliyyət göstərən Mədəniyyət Mərkəzinin təşkilatçılığı ilə 27 Sentyabr - Anım Gününə həsr olunmuş tədbir keçirilib.
AZƏRTAC xəbər verir ki, tədbirdə bu ölkədə yaşayan soydaşlarımız və digər qonaqlar iştirak ediblər. Əvvəlcə Azərbaycanın ərazi bütövlüyünün və suverenliyinin bərpası uğrunda mübarizədə şəhid olanların xatirəsi bir dəqiqəlik sükutla yad olunub, Dövlət Himni səsləndirilib.
Mədəniyyət Mərkəzinin direktor müavini Gülnar Tağızadə bu günün xalqımızın qəhrəmanlıq tarixində mühüm yer tutduğunu, Vətənimizin suverenliyi və ərazi bütövlüyü uğrunda canlarından keçmiş qəhrəman şəhidlərin əziz xatirəsinin daim yaşadılacağını və onların hər zaman yüksək ehtiramla yad ediləcəyini vurğulayıb.
Ölkəmizin İtaliyadakı səfiri Rəşad Aslanov 27 Sentyabrın Azərbaycanın müasir tarixində ən önəmli günlərdən biri olaraq qalacağını, xalqımızın yaddaşından heç vaxt silinməyəcəyini qeyd edib. Səfir vurğulayıb ki, 44 günlük Vətən müharibəsinin başlanğıc tarixi olan həmin gün Azərbaycan Respublikasının Prezidenti, Ali Baş Komandan İlham Əliyevin rəhbərliyi ilə Ordumuz və xalqımız torpaqlarımızı işğaldan azad etmək və suverenliyimizi bərpa etmək üçün mübarizəyə qalxdı. Bu mübarizə, eyni zamanda, Azərbaycan dövlətinin heç zaman işğalla barışmadığını sübut etdi.
Diplomat bildirib ki, bu il avqustun 8-də Vaşinqtonda əldə olunmuş sülh razılaşması Azərbaycanın sülh təşəbbüsü irəli sürən və sülh prinsiplərini təşviq edən dövlət kimi tanınmasını, həmçinin sülh üçün də mübarizə etdiyini bir daha göstərdi.
Hərbi attaşenin baş köməkçisi, ikinci dərəcəli kapitan Ruslan Xalıyev çıxışında bildirib ki, 27 Sentyabr Azərbaycanın tarixi ədaləti bərpa etməsinə səbəb olub. O deyib ki, Zəfərə istiqamətlənmiş bu yolun tarixi var və memarı məhz Ulu Öndər Heydər Əliyevdir. Bu, tarix, eyni zamanda, Azərbaycan Prezidenti, Silahlı Qüvvələrin Ali Baş komandanı İlham Əliyevin “Güclü ordu - güclü dövlət!” şüarının yalnız şüar olaraq qalmadığını göstərdi. R.Xalıyev bu mübarizənin yalnız Ordumuzun apardığı mübarizə deyil, həmçinin Müzəffər Ali Baş Komandan İlham Əliyevin siyasi və diplomatik mübarizəsinin təntənəsi olduğunu bildirib.
Daha sonra Bakı Media Mərkəzi tərəfindən çəkilən və Azərbaycan Ordusunun Vətən müharibəsindəki qəhrəmanlığına və şəhidlərimizin əziz xatirəsinə həsr olunan “Biz” filmi nümayiş etdirilib.
Roma
Bölmənin digər xəbərləri
