Rusiyada leqal statusunu itirmiş miqrantları deportasiya etmək təklif olunub
Moskva, 11 iyun, AZƏRTAC
İşini itirən, ali məktəblərdən qovulan, barmaq izi götürülməyən və rus dilini öyrənməyən miqrantlardan Rusiyanı tərk etmək tələb olunur.
AZƏRTAC xəbər verir ki, bu barədə Rusiyanın daxili işlər naziri Vladimir Kolokoltsev məlumat verib. Daxili İşlər Nazirliyi (DİN) rəhbərinin müvafiq açıqlaması bu nazirliyin rəsmi “Telegram” kanalında dərc olunub. O vurğulayıb ki, ölkədə qanuni əsas olmadan qalan miqrant qalmamalıdır.
“İşini itirənlər, ali məktəblərdən xaric edilənlər, barmaq izi götürülməyənlər, dil öyrənməyənlər və Rusiya cəmiyyətinə faydası olmayanlar ölkəmizi tərk etməlidirlər”, -deyə nazir qeyd edib.
O, sənəd qəbulu məntəqələrində miqrantların toplaşması hallarının aradan qaldırılmasının vacibliyinə də diqqət çəkib. Rusiya Daxili İşlər Nazirliyinin rəhbərinin sözlərinə görə, mediada vaxtaşırı dərc olunan növbələrin fotoşəkilləri və videoları qəbulun təşkilində nöqsanlardan xəbər verir. Bununla bağlı o, tabeliyində olanlara prosesin vaxtında və izdihamsız təşkil olunmasını tapşırıb.
Fəridə Abdullayeva
AZƏRTAC-ın xüsusi müxbiri
Moskva
Bölmənin digər xəbərləri
