Rusiyada sosial şəbəkələrdə reklamlara görə məsuliyyətlə bağlı xəbərdarlıq edilib
Moskva, 10 mart, AZƏRTAC
Rusiya Federal Antiinhisar Xidməti (FAS) bəyan edib ki, ölkə daxilində çıxışı məhdudlaşdırılan bir sıra internet platformalarında reklam yerləşdirmək reklam qanunvericiliyinin pozulması kimi qiymətləndirilə bilər.
AZƏRTAC xəbər verir ki, bu barədə idarənin media açıqlamasında deyilir. FAS xatırladıb ki, Rusiyada fəaliyyəti arzuolunmaz hesab edilən informasiya resurslarında, eləcə də girişi məhdud olan saytlarda reklamın yayılmasına yol verilmir.
Departament izah edib ki, Roskomnadzor bir sıra sosial platforma və xidmətlərə, o cümlədən “Instagram” və “Facebook”, “YouTube” videohostinqi, VPN xidmətləri, həmçinin “Telegram” və “WhatsApp” mesencerlərinə məhdudiyyətlər tətbiq etdikdən sonra bu resurslarda reklamların yerləşdirilməsi qanun pozuntusu əlamətlərini ehtiva edə bilər. FAS qeyd edib ki, bu cür pozuntulara görə həm reklamçılar, həm də reklam distribütorları məsuliyyətə cəlb oluna bilər.
Fəridə Abdullayeva
AZƏRTAC-ın xüsusi müxbiri
Moskva
Bölmənin digər xəbərləri
