RUSİYANIN SƏHİYYƏ NAZİRİ ÖVLADLIĞA UŞAQ GÖTÜRMÜŞDÜR
AZƏRTAC “Novosti” agentliyinə istinadla xəbər verir ki, Rusiyanın səhiyyə və sosial inkişaf naziri Mixail Zurabov ikiyaşlı uşağı övladlığa götürmüşdür. Nazir bunu hökumətin Rusiyada uşaqların vəziyyətinin yaxşılaşdırılması məsələlərinin müzakirə olunduğu iclasından sonra jurnalistlərə bildirmişdir. O, başqa nazirlərə də belə addımı atmağı məsləhət görüb-görməyəcəyi barədə suala cavabında demişdir: “Bu, sırf şəxsi məsələdir. Müəyyən mənada mənim üçün həll olunmuşdur, çünki artıq övladlığa götürmüşəm”.
Nazir dəqiqləşdirmişdir ki, onun dörd ay əvvəl övladlığa götürdüyü iki yaşında oğlan uşağıdır.
Mixail Zurabov ailəlidir, bir oğul və bir qız atasıdır.
Rusiya Səhiyyə və Sosial İnkişaf Nazirliyinin məlumatına görə, keçən il Rusiyada kimsəsiz uşaqların sayı 730 min nəfərdən çoxdur, onların təxminən 200 mini internat məktəblərdə tərbiyə olunur.
Bölmənin digər xəbərləri
