Rusiyanın Ukraynaya massiv hücumu 14 vilayətdə evlərə və mülki infrastruktura ziyan vurub
Kiyev, 30 avqust, AZƏRTAC
Rusiyanın Ukraynaya yeni kütləvi hücumu nəticəsində 14 vilayətdə yaşayış binalarına və mülki infrastruktura ziyan dəyib.
Bu barədə AZƏRTAC Ukrayna Prezidenti Volodimir Zelenskinin bəyanatına istinadla xəbər verir.
“Zaporojyedə Rusiyanın beşmərtəbəli yaşayış binasına zərbə endirdiyi yerə bütün xidmətlər cəlb olunub. Təəssüf ki, indiyədək bir nəfərin öldüyü, onlarla insanın, o cümlədən uşaqların yaralandığı xəbərini almışıq. Yenə də adi yaşayış binasına hücum edilib”, -deyə dövlət başçısı bildirib.
Zelenski qeyd edib ki, həmin gecə hava hücumundan müdafiə qüvvələri və fövqəladə hallar xidməti digər bölgələrdə də işləyib. Volın, Dnepr, Donetsk, Jitomir, Zaporojye, İvano-Frankovsk, Kiyev, Rovno, Sumı, Xarkov, Xmelnitski, Çerkassı, Çernivtsi, Çerniqov vilayətləri də hücum nəticəsində ziyan çəkib. Əsasən mülki infrastruktur - evlər, müəssisələrdə yanğınlar baş verib. Demək olar ki, 540 pilotsuz uçuş aparatı, 8 ballistik raket və 37 digər növ raket buraxılıb.
“Ukrayna artıq əvvəlki massiv hücumlara dünyanın reaksiyasını görüb. Amma indi Rusiya bir daha göstərir ki, sözə əhəmiyyət vermir, biz real hərəkətlərə ümid edirik. Aydındır ki, Moskva liderlər səviyyəsində görüş təşkil etmək üçün ayrılmış vaxtdan yeni kütləvi zərbələr hazırlamaq üçün istifadə edib”, -deyə Prezident vurğulayıb.
Ukrayna rəhbərinin fikrincə, diplomatiya üçün fürsət pəncərəsini yenidən açmağın yeganə yolu Rusiya ordusuna maliyyə dəstəyi göstərən hər kəsin əleyhinə sərt tariflər və Moskvanın özünə qarşı bank və enerji sahələrində effektiv sanksiyalardır.
“Bu müharibə siyasi bəyanatlarla bitməyəcək - real addımlar atmaq lazımdır. Biz Amerika, Avropa və bütün dünyadan belə addımlar gözləyirik”, -deyə Zelenski bildirib.
Avqustun 30-na keçən gecə Rusiya Ukraynaya genişmiqyaslı raket zərbəsi endirib. Kiyev, Lutsk, Zaporojye, Dnepr və ölkənin digər bölgələri atəşə tutulub.
Emil Hüseynli
AZƏRTAC-ın xüsusi müxbiri
Kiyev
Bölmənin digər xəbərləri
