Saatlının Mollavazlı və Bəylər kəndləri içməli su ilə təmin olunub
3790 nəfər əhali mərkəzləşdirilmiş su təchizatı sistemi ilə təchiz edilib
Bakı, 3 dekabr, AZƏRTAC
Bölgələrdə içməli su infrastrukturunun yaxşılaşdırılması istiqamətində işlər davam etdirilir. Bu işlərin davamı olaraq, Saatlı rayonunun Mollavazlı və Bəylər kəndlərində içməli su layihəsinin açılış mərasimi keçirilib.
Bu barədə AZƏRTAC-a Azərbaycan Dövlət Su Ehtiyatları Agentliyindən (ADSEA) məlumat verilib.
Tədbirdə Azərbaycan Dövlət Su Ehtiyatları Agentliyinin sədrinin müavini İlham Bayramov, Saatlı Rayon İcra Hakimiyyətinin başçısı Elmir Bağırov, Agentliyin tabeliyində olan Regional Su Meliorasiya Xidmətinin İdarə Heyətinin sədri Zakir Quliyev, Agentliyin nümayəndələri və kənd sakinləri iştirak ediblər. Bildirilib ki, hazırda bir çox bölgələrdə əhalinin içməli və suvarma suyu ilə təminatı istiqamətində böyük layihələr icra olunur. Bu layihələr növbəti illərdə də davam etdiriləcək. Əsas məqsəd kəndlərdə yaşayan əhalinin dayanıqlı və keyfiyyətli içməli, eləcə də suvarma suyu ilə təmin olunmasıdır.
Saatlı rayonunun Mollavazlı və Bəylər kəndlərində mərkəzləşdirilmiş su təchizatı sisteminin yaradılması məqsədi ilə şəhərin mövcud su təchizatı sisteminin imkanlarından istifadə etməklə kənddaxili şəbəkə sistemi inşa olunub. Mollavazlı kəndinin mövcud su şəbəkəsinin genişləndirilməsi məqsədilə 7 kilometr su şəbəkəsi inşa olunub və abonentlərin sayı 350-yə çatdırılıb.
Bəylər kəndində də 4 kilometr su şəbəkəsi inşa olunub və abonentlərin sayı 296 çatdırılıb.
Ümumilikdə hər iki kənd üzrə əhaliyə verilən suyun dəqiq uçotunun aparılması və sudan qənaətlə istifadə məqsədi ilə hər bir abonent su sayğacları ilə təchiz olunub. Layihə çərçivəsində Mollavazlı və Bəylər kəndi üzrə 3790 nəfər əhali mərkəzləşdirilmiş su təchizatı sistemi ilə təchiz edilib.
Qeyd edək ki, Saatlı şəhərinin mövcud su təchizatı sistemi Kür Su Təmizləyici Qurğusundan magistral su kəmərləri vasitəsilə təmin olunur. Şəhərdə 11.7 kilometr magistral su kəməri, 136 kilometr daxili paylayıcı şəbəkə, 1 meydançada həcmi 2x5000 kubmetr olan su anbarları kompleksi və 1 mərkəzi su nasos stansiyası istismar olunur. Şəhərin ümumi abonent sayı 4498, kənd abonentinin sayı isə 1281 təşkil edir. Ümumi olaraq 5779 abonentə xidmət göstərilir. Rayon üzrə 11 yaşayış məntəqəsinə mərkəzləşmiş su təchizat xidməti göstərilir. Həmçinin 26 kənddə modul tipli içməli su təmizləyici qurğular olmaqla, bulaqlar vasitəsilə su təminatı həyata keçirilir.
2026-cı ildə layihənin davamı olaraq rayonun Əlisoltanlı və Potubəyli kəndlərində mərkəzləşdirilmiş su şəbəkəsinin və sayğacların quraşdırılması işləri, həmçinin su təminatı zəif olan Nabat və Çolpı kəndlərinin su təminatı məqsədilə 2026-2027-ci illərdə su təchizatı sisteminin layihə sənədlərinin hazırlanması və tikintisi işlərinin icrası planlaşdırılır.
Sonda kənd ağsaqqalları göstərilən diqqət və qayğıya görə dövlətimizin başçısına minnətdarlıqlarını bildirib, layihənin icrasında əməyi olan hər kəsə və bu sahədə çalışan əməkdaşlara təşəkkür ediblər.
Bölmənin digər xəbərləri
