Sabit Bağırov: Ermənistanın törətdiyi ekoloji risklərlə bağlı konkret tələblər qoyulmalıdır
Bakı, 27 fevral, AZƏRTAC
Ermənistan dağ-mədən sənayesində birbaşa qiymətli metallar sahəsi ilə 26 şirkət məşğuldur. Təbii ki, bu şirkətlər ciddi ekoloji risklər törədir. Həmin proseslər zamanı zərərverici kimyəvi maddələrdən istifadə olunur, bunlar hamısı xüsusi anbarda toplanır və bu 15 anbarın vəziyyəti bərbaddır. Bu da təbii ki, narahatlıq doğurur.
AZƏRTAC xəbər verir ki, bunu “Environmental Protection First” (EPF) Koalisiyasının həmtəsisçisi Sabit Bağırov QHT-lər Ermənistanın dağ-mədən sənayesinin ekoloji fəsadlarına dair topoqrafik və rəqəmsal xəritənin təqdimatında deyib.
Onun sözlərinə görə, bu riskləri azaltmaq üçün Mədən Sənayesində Şəffaflıq Təşəbbüsü öz Standartında ekoloji normaların tətbiqinə dair meyarları gücləndirməlidir: “Bu tələblər tövsiyə xarakteri daşıyır, yaxşı olar ki, onlar tələbə çevrilsin. Belə olsa, Mədən Sənayesində Şəffaflıq Təşəbbüsünün üzvü olan Ermənistan bu sahədə daha şəffaf və məsuliyyətli olar. BMT-nin Transsərhəd su axarlarının və beynəlxalq göllərin mühafizəsi və istifadəsi haqqında Konvensiyası üzrə Katibliyi də bu problemlə bağlı konkret mövqe ortaya qoymalıdır. Biz onlarla da görüşməyə hazırıq. Çünki Ermənistan bu Konvensiyaya qoşulmaqdan qaçır”, - deyə o qeyd edib.
Bölmənin digər xəbərləri
