Sabunçu rayonunda keçmiş məhkumda külli miqdarda heroin və silah aşkarlanıb
Bakı, 1 mart, AZƏRTAC
Sabunçu rayonunda narkotik vasitələrin satışı ilə məşğul olan şəxsdə külli miqdarda heroin və silah aşkar edilib.
Daxili İşlər Nazirliyinin mətbuat xidmətindən AZƏRTAC-a bildiriblər ki, narkotik vasitələrin qanunsuz dövriyyəsi və satışı ilə məşğul olan şəxs, əvvəllər məhkum edilmiş Şahin Mahmudov Ramana qəsəbəsi ərazisində Sabunçu Rayon Polis İdarəsinin 12-ci polis şöbəsinin əməkdaşları tərəfindən həyata keçirilən əməliyyat nəticəsində saxlanılıb. Onun üzərindən ümumilikdə 4 qrama yaxın heroin və metamfetamin, həmçinin elektron tərəzi aşkarlanıb. Əməliyyat tədbirlərinin davamı olaraq Ş.Mahmudovun yaşadığı evdə satış məqsədilə əldə etdiyi killi miqdarda heroin olduğu da müəyyənləşdirilib. Onun mənzilinin zirzəmisinə baxış zamanı 1 kiloqram 100 qram heroin və müvafiq sənədləri olmayan ov tüfəngi aşkarlanaraq götürülüb.
Faktla bağlı saxlanılan şəxs barəsində Sabunçu Rayon Polis İdarəsində Cinayət Məcəlləsinin müvafiq maddəsi ilə cinayət işi başlanıb və o, tutularaq istintaqa cəlb olunub. Narkotik maddələrin mənbəyinin müəyyənləşdirilməsi istiqamətində zəruri istintaq və əməliyyat tədbirləri davam etdirilir.
Bölmənin digər xəbərləri
