Şagirdlərin ekoloji tərbiyəsinə diqqət artırılır
Naxçıvan, 21 aprel, AZƏRTAC
Ekoloji tarazlığın qorunması günümüzün aktual problemlərindən biridir. Kiçik yaşlardan uşaqları təbiətə qayğılı münasibət ruhunda tərbiyə etmək, ekoloji şüuru və mədəniyyəti formalaşdırmaq müəllimlərin qarşısında duran mühüm vəzifələrdəndir. Şagirdlərə aşılanmalıdır ki, hər bir insan - şəxsiyyət və vətəndaş kimi öz yurdunun, bəşər övladı kimi isə dünyanın ekoloji vəziyyəti və tarazlığı üçün məsuliyyət hiss etməli, onun pozulması hallarına barışmazlıq göstərməlidir.
Naxçıvan Müəllimlər İnstitutunun mətbuat və ictimaiyyətlə əlaqələr xidmətindən AZƏRTAC-ın Naxçıvan bürosuna bildirilib ki, bu sözləri “Şagirdlərin ekoloji tərbiyəsində coğrafiya və biologiya fənlərinin imkanları” mövzusunda keçirilən konfransda çıxış edən institutun rektoru Azad Novruzov deyib. Rektor vurğulayıb ki, Ermənistanın işğalçılıq siyasətinin, erməni barbarlığının nəticəsində vaxtilə işğal olunmuş ərazilərdə bitki örtüyünə, meşələrinə amansız divan tutulub. Ermənilər hektarlarla meşə sahələrini, çoxsaylı təbiət abidələrini vəhşicəsinə məhv ediblər. Onların Azərbaycana qarşı ekoloji terroruna 44 günlük Vətən müharibəsi ilə son qoyulub. Bundan sonra dövlətimizin apardığı siyasət nəticəsində işğaldan azad edilən bölgələrimiz bərpa olunmaqla yanaşı, burada ekoloji tarazlığın qorunması istiqamətində də məqsədyönlü tədbirlər həyata keçiriləcək.
“Ekoloji tarazlığın qorunması, bu işin sistemli təşkili və müxtəlif fənlərin imkanlarından istifadə etməklə şagirdlərin ekoloji dünyagörüşünü formalaşdırmaq, onların ekoloji tərbiyəsini təmin etməklə mümkündür”, - deyən Azad Novruzov qeyd edib ki, şagirdlərin ekoloji tərbiyəsində daha çox imkanlara malik olan coğrafiya və biologiya fənn müəllimlərinin bilik və bacarıqlarının müasir tələblər baxımından təkmilləşdirilməsi olduqca zəruridir.
Tədbirdə Naxçıvan Müəllimlər İnstitutunun Ümumi fənlər kafedrasının müdiri, dosent Qızıllı Əliyevanın ”Şagirdlərdə ekoloji dünyagörüşün formalaşdırılmasının əhəmiyyəti”, həmin kafedranın müəllimləri biologiya üzrə fəlsəfə doktoru Lamiyə Quliyevanın “Ekoloji problemlərin biomüxtəlifliyə təsiri”, biologiya üzrə fəlsəfə doktoru Afaq Əliyevanın “Biologiya dərslərində ekoloji biliklərin öyrədilməsi” və Ülviyyə İsgəndərovanın “Coğrafiya dərslərində şagirdlərə ekoloji tərbiyənin formalaşdırılması yolları” mövzularında çıxışları dinlənilib.
Sonda tədbir iştirakçılarının sualları cavablandırılıb, videocarx nümayiş olunub.
Qeyd edək ki, Naxçıvan Müəllimlər İnstitutunun Ümumi fənlər kafedrasının təşkilatçılığı ilə keçirilən konfransda institutun professor müəllim heyəti ilə yanaşı, Naxçıvan Muxtar Respublikası orta ümumtəhsil məktəblərinin bir qrup coğrafiya və biologiya müəllimi və tələbələr iştirak ediblər.
Bölmənin digər xəbərləri
