Sahibkarlar üçün videoformatda təlimlər keçirilib
Bakı, 31 avqust, AZƏRTAC
Maliyyə Sabitliyi Şurasının 2019-cu il 20 sentyabr tarixli qərarı ilə Azərbaycan Respublikasının Mərkəzi Bankı (AMB), İqtisadi İslahatların Təhlili və Kommunikasiya Mərkəzi və Bank Tədris Mərkəzi arasında imzalanmış müvafiq tədbirlər planı əsasında sahibkarlar üçün videoformatda təlimlər təşkil edilib.
AMB-dan AZƏRTAC-a bildirilib ki, Azərbaycan Beynəlxalq Bankı “Sahibkarlar Klubu” üzvlərinin iştirak etdiyi təlimlər avqustun 15-22-də keçirilib və “Sahibkarın pul axını və kredit” mövzusuna həsr edilib. Təlimdə sahibkarlara maliyyə resurslarının effektiv idarə edilməsi, o cümlədən gəlir və xərc proqnozlarının düzgün aparılması, risklərin qiymətləndirilməsi, maliyyə ilə bağlı digər məsələlərin optimal həll yolları ilə bağlı ətraflı məlumatlar verilib və mövzu üzrə sahibkarları maraqlandıran suallara aydınlıq gətirilib.
Qeyd edək ki, Mərkəzi Bank müvafiq tədbirlər planının icrasına uyğun əhalinin, o cümlədən bank sektoru mütəxəssislərinin, sahibkarların və digər hədəf qruplarının maliyyə bilik və bacarıqlarının artırılmasına yönəlmiş maarifləndirmə tədbirlərini davam etdirir.
Bölmənin digər xəbərləri
