Şalva Papuaşvili: Uzunmüddətli sülh rifahın və inkişafın təməlidir
Tbilisi, 24 noyabr, AZƏRTAC
Regional əməkdaşlıq, dialoq, sülh və sabitlik davamlı inkişaf üçün mühüm əhəmiyyət kəsb edir. Biz yaxşı başa düşürük ki, uzunmüddətli sülh rifahın və inkişafın təməlidir.
AZƏRTAC xəbər verir ki, bu sözləri Gürcüstan parlamentinin sədri Şalva Papuaşvili bu gün Qara Dəniz İqtisadi Əməkdaşlıq Təşkilatı Parlament Assambleyasının (QDİƏT PM) 66-cı Baş Assambleyasında çıxış zamanı söyləyib.
O bildirib ki, son illər QDİƏT üçün çətin dövr olub, xüsusilə Rusiya-Ukrayna müharibəsi və Qara Dəniz regionunda baş verən geosiyasi dəyişikliklər təşkilatın fəaliyyətinə təsir göstərib. Buna baxmayaraq, QDİƏT fəaliyyətini davam etdirə bilib və dialoq, təcrübə mübadiləsi və region üçün mühüm nəticələrin əldə olunmasında xüsusi rol oynayıb.
Papuaşvili regionun strateji, iqtisadi və təhlükəsizlik baxımından əhəmiyyətini qeyd edərək bildirib ki, uzunmüddətli sülh rifahın və inkişafın təməlidir. O, Ukraynada ədalətli və davamlı sülhün yalnız Ukrayna üçün deyil, həm də Avropa və Qara Dəniz regionunda sabitliyin təmin edilməsi üçün vacib olduğunu vurğulayıb.
O deyib ki, Gürcüstanın QDİƏT-ə sədrliyi parlamentlərarası əlaqələrin inkişafına, iqtisadi əməkdaşlığın gücləndirilməsinə və diplomatiyanın təkmilləşdirilməsinə yönələcək.
“Biz regionumuzu əməkdaşlıq və imkanlarla fərqləndirmək üçün parlament diplomatiyasının gücündən istifadə etməyə hazırıq", - deyə Papuaşvili əlavə edib.
Xətayi Əzizov
AZƏRTAC-ın xüsusi müxbiri
Tbilisi
Bölmənin digər xəbərləri
