SAMMİTİN YEKUNLARINA DAİR MƏTBUAT KONFRANSI
AZƏRTAC-ın xüsusi müxbiri xəbər verir ki, mayın 11-də Krakovda Enerji sammiti başa çatdıqdan sonra yekunlara dair mətbuat konfransı keçirilmişdir.
Konfransda Azərbaycan Prezidenti İlham Əliyev, Polşa Prezidenti Lex Kaçinski, Ukrayna Prezidenti Viktor Yuşşenko, Gürcüstan Prezidenti Mixail Saakaşvili, Litva Prezidenti Valdas Adamkus, habelə Qazaxıstanın energetika və mineral ehtiyatlar nazirinin müavini Lyəzzət Kiinov iştirak edirdilər.
Konfransı Polşa Prezidenti açaraq dedi ki, bu gün səmərəli şəkildə başa çatan sammitin yekunlarına dair Birgə rəsmi məlumat imzalanmışdır.
Litva Prezidenti çıxışında həmin sənəddə mühüm məsələlərin əksini tapdığını, əsasən, nəqliyyat infrastrukturunun inkişafı, neft və qazın Avropa və dünya bazarlarına nəqli, Baltik dənizi, Qara dəniz və Xəzər dənizi regionu ölkələrinin əməkdaşlığı, Avropaya inteqrasiya məsələlərini əhatə etdiyini bildirdi.
Sonra Polşa Prezidenti çıxış edərək, Birgə rəsmi məlumatda nəzərdə tutulan məsələlərin ölkələrimiz arasında daha konkret layihələrin həyata keçirilməsinə imkan verəcəyini söylədi. Gürcüstan Prezidenti Azərbaycanın enerji məsələsində tutduğu mövqeyi yüksək qiymətləndirdi və regionda Azərbaycan-Gürcüstan əməkdaşlığını nümunə gətirdi. O dedi ki, biz Xəzər neftinin Gürcüstan-Ukrayna-Polşa marşrutu ilə Avropaya nəqlində maraqlıyıq. Ukrayna Prezidenti çıxışında hazırda dünyada enerji məsələlərinin ön planda olduğunu bildirdi və dost ölkələrin enerji təhlükəsizliyinin təmin edilməsində Azərbaycanın mövqeyini dəstəklədiklərini söylədi.
Azərbaycan Prezidenti İlham Əliyev çıxışında sammitin yüksək səviyyədə təşkilinə görə Prezident Lex Kaçinskiyə təşəkkürünü bildirdi. Aparılan danışıqların məzmunundan söhbət açan dövlətimizin başçısı dedi ki, regional əməkdaşlıq üçün yaxşı şərait var. Enerji təhlükəsizliyi hazırda Avropanı ən çox maraqlandıran məsələlərdəndir. Azərbaycan enerji sahəsində böyük potensiala malikdir və regional əməkdaşlığa böyük töhfə verəcəkdir. Ölkəmizin yeni yataqlara, boru kəmərlərinə sahib olduğunu xatırladan Prezident İlham Əliyev hazırda Azərbaycanın öz təbii sərvətlərini müxtəlif kəmərlər vasitəsilə Avropaya və dünya bazarlarına çıxardığını vurğuladı.
Dövlətimizin başçısı bildirdi ki, qarşıda enerji sahəsində əməkdaşlığa dair konkret işlər durur. İmzalanmış Birgə rəsmi məlumatda bütün məsələlərdə ölkələrin mövqeyi öz əksini tapıbdır. Prezident İlham Əliyev dedi ki, Xəzər dənizi, Qara dəniz və Baltik dənizi regionları vahid regiona çevrilir. Avropa İttifaqı ilə imzalanmış sənədlər bizə daha geniş imkanlar yaradır.
Sonra çıxış edən Qazaxıstan nümayəndəsi ölkəsinin öz neftini müxtəlif marşrutlarla dünya bazarlarına çıxarmaq hüququna malik olduğunu bildirdi.
Sonra dövlət başçıları jurnalistlərin suallarına cavab verdilər. Prezident İlham Əliyev suallara cavabında bildirdi ki, Azərbaycanın öz neftini və qazını dünya bazarlarına çıxarmaq istəyi böyükdür və bu sahədə heç bir problem yoxdur. Azərbaycan neftinin Bakı-Tbilisi-Ceyhan boru kəməri vasitəsilə dünya bazarlarına nəqlini xatırladan dövlətimizin başçısı dedi ki, biz neftimizin müxtəlif marşrutlarla nəqlinə tərəfdarıq.
Digər prezidentlər də jurnalistlərin suallarına cavab verdilər. Mətbuat konfransında Azərbaycanın enerji sahəsində əldə etdiyi nailiyyətlər, neftin dünya bazarlarında çıxarılmasında tutduğu mövqe birmənalı şəkildə dəfələrlə vurğulandı.
X X X
Günün sonunda Polşa Respublikasının Prezidenti Lex Kaçinskinin adından sammit iştirakçılarının şərəfinə ziyafət verildi. Azərbaycan Prezidenti İlham Əliyev ziyafətdə iştirak edirdi.
Azərbaycan Prezidentinin Polşaya səfəri davam edir.
Bölmənin digər xəbərləri
