Bakı, 15 fevral, AZƏRTAC 

Daxili İşlər Nazirliyinin (DİN) Baş Narkotiklərlə Mübarizə İdarəsi və Qərb Bölgəsində Regional Şöbəsi əməkdaşlarının əldə edilmiş məlumat əsasında Gəncədə keçirdikləri əməliyyat-axtarış tədbiri nəticəsində narkotiklərin qanunsuz dövriyyəsində şübhəli bilinən Samux rayon sakini Y.Əliyevin idarə etdiyi “Mercedes” markalı avtomobilə baxış keçirilib.

DİN-in mətbuat xidmətindən AZƏRTAC-a bildiriblər ki, baxış zamanı nəqliyyat vasitəsindən kokain və tramadol həbləri, eləcə də avtomobildə olan sərnişin E.Qarayevdən heroin, metadon, metamfetamin, saxta olması ehtimal edilən 100 manatlıq pul əsginası və bir bıçaq aşkarlanaraq götürülüb. E.Qarayevin yaşadığı evdən isə əlavə olaraq 4 kiloqram 114 qramdan çox marixuana götürülüb.

Masallı rayonunda narkotik vasitə ilə tutulmuş R.Şiriyevin Ərkivan qəsəbəsindəki yaşadığı evə baxış zamanı oradan qundağı və lüləsi kəsilmiş “TOZ-16” markalı tüfəng və iki patron rayon polis şöbəsinin və Ədliyyə Nazirliyinin Penitensiar Xidmətinin Bakı İstintaq Təcridxanası əməkdaşlarının birgə keçirdikləri əməliyyat tədbiri nəticəsində aşkarlanıb.

Faktla bağlı araşdırmalar davam etdirilir.