SARISU GÖLÜNÜN İMİŞLİ RAYONU ƏRAZİSİNDƏKİ HİSSƏSİNDƏ SAHİL MÜHAFİZƏ BƏNDİNDƏ BƏNDBƏRKİTMƏ İŞLƏRİ DAVAM ETDİRİLİR
İmişli, 22 may (AZƏRTAC). Kürün daşması nəticəsində ölkəmizdə baş vermiş təbii fəlakətlə bağlı Prezident İlham Əliyevin verdiyi tapşırıq və göstərişlərə uyğun olaraq daşqından əziyyət çəkən rayonlarda kompleks işlər davam etdirilir.
Hazırda təhlükə yarana biləcək ərazilərdə aidiyyatı orqanların əməkdaşları fasiləsiz fəaliyyət göstərirlər.
Sarısu gölünün İmişli rayonu ərazisindəki hissəsində sahil mühafizə bəndində bəndbərkitmə işləri davam etdirilir. Daşqının nəticələrinin aradan qaldırılması üçün Fövqəladə Hallar Nazirliyi və digər aidiyyatı qurumların canlı qüvvələri hadisə yerində işləyir. Dağılmış bəndlərdə ağır texnikanın köməyi ilə bərpa və bərkitmə işləri aparılır. Müvafiq təhlükəsizlik tədbirləri görülür. Bununla yanaşı, Araz çayının yeni qolunun açılması üçün hazırlıq işləri gedir.
Sabirabad rayonunda ümumi vəziyyət sabitdir. Qoruyucu bəndlərin bərkidilməsinə yerli icra hakimiyyətinin qüvvələri və kənd sakinləri cəlb edilmişdir.
Rayon sakinləri təbii fəlakətin nəticələrinin aradan qaldırılması ilə bağlı görülən işlərə görə Prezident İlham Əliyevə minnətdarlıqlarını bildirirlər.
Ümumilikdə fəlakət bölgəsində Fövqəladə Hallar, Müdafiə nazirliklərinin, Daxili Qoşunların və müvafiq qurumların canlı qüvvələri və texnikası fasiləsiz çalışır, bölgədə vəziyyət stabildir.
Bölmənin digər xəbərləri
