“Satellite Evolution”: Azərbaycan kosmosu müşahidə edən ölkədən kosmik tədqiqatları formalaşdıran ölkəyə çevrilib
Bakı, 24 oktyabr, AZƏRTAC
Nüfuzlu beynəlxalq “Satellite Evolution” nəşri Azərbaycan Respublikasının Kosmik Agentliyi — “Azərkosmos”un Yer səthinin müşahidəsi və sosial-iqtisadi inkişafı dəstəkləyən peyk həllərinin tətbiqi sahəsində 10 illik fəaliyyətinə həsr olunmuş məqalə dərc edib.
AZƏRTAC xəbər verir ki, məqalədə “Azərkosmos” tərəfindən “Kosmosdan gələn imkanlar: Kosmik müşahidəmizin sosial-iqtisadi inkişafa töhfəsinin 10 ili” tədbirinin yüksək səviyyədə təşkil olunduğu vurğulanır.
“Satellite Evolution” vurğulayıb ki, tədbir dövlət qurumlarını, biznesi, elmi dairələri və media nümayəndələrini bir araya gətirərək Yer müşahidəsi texnologiyalarının məlumatları real həllərə çevirdiyini nümayiş etdirib – bu da dövlət və özəl sektora daha çevik, effektiv və dayanıqlı qərarlar qəbul etməyə imkan yaradır.
Nəşr xüsusilə “Peyk xidmətləri Azərbaycanın inkişafına necə töhfə verir” adlı sessiyaya diqqət çəkib. Burada Azərbaycanın ilk yüksək dəqiqlikli müşahidə peyki “Azersky” vasitəsilə əldə olunan məlumatların praktiki tətbiq nümunələri təqdim olunub. Fəaliyyəti dövründə “Azersky” 80 mindən çox yüksək dəqiqlikli təsvir arxivi yaradıb. Bu məlumatlar bir sıra sahələrdə geniş istifadə olunur: kənd təsərrüfatı – əkin planlamasının optimallaşdırılması və məhsuldarlığın monitorinqi; ekologiya və iqlim – meşələrin qırılması, torpaq deqradasiyası və çirklənmənin izlənməsi; şəhərsalma – ağıllı şəhərlər və infrastruktur layihələrinin dəstəklənməsi; su və torpaq idarəçiliyi – təbii resursların qiymətləndirilməsi və səmərəli istifadəsi.
Nəşr qeyd edir ki, “Azərkosmos” artıq tam peyk ekosistemi formalaşdırır. Agentlik öz Coğrafi İnformasiya Sistemi (CİS) Mərkəzi vasitəsilə təxminən 1000 yerli və beynəlxalq layihəyə dəstək göstərib.
“Satellite Evolution” həmçinin bildirir ki, hazırda “Azersky-2” adlı növbəti nəsil peykin hazırlanması üzərində işlər aparılır. Bu layihə Azərbaycanın kosmik texnologiyalar sahəsində imkanlarını daha da gücləndirəcək.
Nəşrin fikrincə, “Azərkosmos” artıq qlobal səviyyədə etibarlı peyk xidmətləri təminatçısı kimi tanınır və Azərbaycan kosmosu sadəcə müşahidə edən deyil, fəal şəkildə onun tədqiqatlarını formalaşdıran ölkəyə çevrilib.
“Azərkosmos bütün dünyadan tərəfdaşları kosmosun açdığı sonsuz imkanları birgə kəşf etməyə dəvət edir”, - deyə “Satellite Evolution” vurğulayır.
Bölmənin digər xəbərləri
