Bakı, 12 dekabr, AZƏRTAC

Azərbaycanın xarici işlər naziri Elmar Məmmədyarov Əfqanıstanın ölkəmizdə yeni təyin olunmuş səfiri Məhəmməd Taqi Xəlili ilə görüşüb.

Xarici İşlər Nazirliyinin mətbuat xidmətindən AZƏRTAC-a bildiriblər ki, görüşdə Azərbaycan ilə Əfqanıstan arasında ənənəvi dostluq münasibətlərinin inkişafından məmnunluq ifadə olunub.

Nazir E.Məmmədyarov Azərbaycanın dost Əfqanıstan ilə əlaqələrinin inkişafına mühüm əhəmiyyət verdiyini söyləyərək, elm-təhsil, təlim, sərmayələr, humanitar, nəqliyyat və digər sahələrdə ikitərəfli əməkdaşlığın bundan sonra da uğurla inkişaf edəcəyinə ümidvarlığını bildirib.

Səfir M.T.Xəlili ümummilli lider Heydər Əliyevin vəfatının ildönümü ilə əlaqədar onun əziz xatirəsinə ehtiramını ifadə edib.

Azərbaycanın Əfqanıstana humanitar, maddi-texniki, təlim və təhsil sahələrində göstərdiyi dəstəyə görə təşəkkürünü bildirən səfir cəsur Azərbaycan əsgərlərinin Beynəlxalq Təhlükəsizliyə Yardım Qüvvələrinin tərkibində Əfqanıstanda sülh və təhlükəsizlik naminə xidmətinin Əfqanıstan hökuməti və xalqı tərəfindən yüksək qiymətləndirildiyini vurğulayıb. Səfir Azərbaycanın inkişaf təcrübəsinin ölkəsi üçün örnək olduğunu deyib.

Görüşdə iki ölkə arasında müqavilə-hüquq bazasının inkişaf etdirilməsi və beynəlxalq təşkilatlar çərçivəsində əməkdaşlıq məsələləri müzakirə olunub.

Məhəmməd Taqi Xəlili etimadnaməsinin surətini nazir Elmar Məmmədyarova təqdim edib.

Elmar Məmmədyarov Məhəmməd Taqi Xəliliyə diplomatik fəaliyyətində uğurlar arzulayıb.

Səfir diplomatik fəaliyyəti müddətində iki ölkə arasında dostluq əlaqələrinin daha da inkişafı üçün səylərini əsirgəməyəcəyini vurğulayıb.