Səməd Seyidov: Türkiyənin rolu artır, Türkiyəsiz Avropa Şurası yoxdur
Strasburq, 12 oktyabr, AZƏRTAC
Assambleyasının sabiq prezidenti Rik Dims bir dəfə görüş zamanı bildirdi ki, bu Parlament Assambleyasında ölkə haqqında deyil, ölkə ilə bağlı danışmalıyıq. Bu vacib bir şeydir.
Bu, həqiqətən çox qəribə və narahatçılıq doğuran faktdır ki, məruzəçilərimiz bunu etməyə, ölkə ilə danışmağa çalışdılar. Amma görürəm ki, onlar ölkə ilə danışmağa başlayanda məruzəçilərin özlərinə qarşı ittihamları başladı. Onlara ölkə haqqında yalnız faktları gündəmə gətirmək, yalnız nöqsanlardan danışa bilərsiniz deyilib, bu çox qəribə və təhlükəli vəziyyətdir.
Bu fikirləri AŞPA-dakı nümayəndə heyətimizin rəhbəri Səməd Seyidov qurumun payız sessiyasında “Türkiyənin Avropa Şurasına üzvlükdən irəli gələn öhdəliklərinə riayət etməsi”nə dair məruzənin müzakirələri zamanı söyləyib. Bildirib ki, məruzə təqdim olunanda Türkiyə, eləcə də bu hesabatı təqdim edən məruzəçilər təzyiq obyektinə çevrilirlər. Mənə elə gəlir ki, bu Assambleyada bəzi qüvvələr demokratiyanı özəlləşdirmək istəyir. İndi Türkiyə haqqında danışan hər kəs öz ölkələrində demokratiya ilə hər şeyin qaydasında olduğunu, yalnız Türkiyədə problemləri olduğunu təqdim etməyə çalışır, xüsusilə də demokratiyadan danışmağa belə haqqı olmayan ölkələr demokratiyadan danışır. Xeyr, heç də burada söylənilən kimi deyil.
Ermənistandan olan həmkarlarım yenə Türkiyədəki proseslərdən narazılıqlarını bildirirlər. 30 ildir mənim ölkəmin ərazisini işğal edən, ərazimizdə hələ də mina yerləşdirən ölkə indi demokratiyadan danışmağa cürət edir. Amma mən Ermənistandan danışmaq istəmirəm.
Ancaq Türkiyə haqqında danışmaq istəyirəm, çünki indi Türkiyənin rolu artır və nəzərə almalıyıq ki, Türkiyəsiz Avropa Şurası yoxdur. Bu haqda düşünməliyik, çünki indi bu bölgədə hər şey, çox şey baş verir.
Qanunun aliliyi, demokratik inkişaf, insan haqları, bütün bunlar bir-biri ilə bağlıdır və bütün bu hadisələri obyektiv şəkildə əks etdirməliyik.
Bu ölkəni ittiham etsək, təhdidləri anlamağa hazır olmasaq, terrorçuları dəqiq adları ilə adlandırmaqda qərarsız olsaq, problemlər daha da çoxalacaq və haqqında düşündüyümüz bu təşkilata üzv dövlətlərin başçılarının IV Sammiti əhəmiyyətli olmayacaq.
Türkiyənin artan vacib rolu, nüfuzu və problemlərinin səbəbləri qəbul edildiyi təqdirdə Assambleya onda əsl demokratiya tələb edə bilər.
Şəhla Ağalarova
AZƏRTAC-ın xüsusi müxbiri
Strasburq
Bölmənin digər xəbərləri
