Sergey Lavrov MDB çərçivəsində təşəbbüsləri və ABŞ ilə təmasları şərh edib
Moskva, 11 aprel, AZƏRTAC
MDB çərçivəsində “1941-1945-ci illər: Əmək Şöhrəti şəhəri” adlı yeni fəxri adın verilməsi haqqında qərar qəbul edilib. Bu mükafat İkinci Dünya müharibəsində Qələbəyə mühüm töhfə vermiş şəhərlərə veriləcək.
AZƏRTAC xəbər verir ki, bu sözləri Rusiyanın xarici işlər naziri Sergey Lavrov Almatıda MDB Xarici İşlər Nazirləri Şurasının iclasının yekunlarına dair brifinqdə deyib.
O bildirib ki, hazırda şəhərlərin siyahısı razılaşdırılır.
S.Lavrov, həmçinin bildirib ki, o, MDB-dəki həmkarları ilə Rusiya ilə ABŞ arasında təmasları, o cümlədən Vaşinqtonun Ukrayna nizamlanmasına yanaşmaları ilə bağlı məsələləri müzakirə edib.
Xarici işlər naziri qeyd edib ki, Rusiya ilə ABŞ arasında məhbusların mübadiləsi etimadın möhkəmlənməsinə kömək edir, lakin onun yekun bərpası vaxt aparacaq. S.Lavrov əlavə edib ki, mübadilə təşəbbüsü hər iki tərəfdən olub.
Onun sözlərinə görə, ABŞ Prezidenti Donald Trampın administrasiyasının nümayəndələri ilə təmaslar dialoqun zəruriliyi ilə bağlı fundamental anlayışı nümayiş etdirib. Nəqliyyat mövzusuna toxunan nazir bildirib ki, ABŞ ilə birbaşa hava əlaqəsinin bərpası məsələsində hələlik konkret irəliləyişdən məlumatı yoxdur.
Fəridə Abdullayeva
AZƏRTAC-ın xüsusi müxbiri
Moskva
Bölmənin digər xəbərləri
