Şərq elmi-nəzəri, filoloji fikri və onun poetika sahəsi - BDU-da ustad dərsi
Bakı, 11 mart, AZƏRTAC
Bakı Dövlət Universitetinin (BDU) Şərqşünaslıq fakültəsində 27 mart – Azərbaycan Respublikasında Elm Gününə həsr olunmuş tədbir keçirilib.
Universitetdən AZƏRTAC-a bildirilib ki, tədbirdə Şərqşünaslıq fakültəsinin elmi işlər üzrə dekan müavini Nigar İsmayılzadə Azərbaycan Respublikasının Prezidenti İlham Əliyevin ölkəmizdə Elm Gününün təsis edilməsi haqqında 2018-ci il 9 aprel tarixli Sərəncamının elmin inkişafı və təbliğinə göstərilən diqqətin bariz nümunəsi olduğunu vurğulayıb. Son illər ölkəmizdə elmin nüfuzunun yüksəldilməsi, cəmiyyətin inkişafında elmin əhəmiyyətinin artırılması və elmi fəaliyyətin stimullaşdırılması istiqamətində həyata keçirilən tədbirlər, fakültənin elmi fəaliyyəti və uğurları barədə məlumat verib. Fakültədə mütəmadi olaraq elmi-praktik konfransların, ustad dərslərinin, seminarların keçirilməsinin əhəmiyyətini qeyd edib.
Daha sonra Ü.Hacıbəyli adına Bakı Musiqi Akademiyasının Humanitar fənlər kafedrasının müdiri professor Tərlan Quliyevin “Şərq elmi-nəzəri, filoloji fikri və onun poetika sahəsi” mövzusunda ustad dərsi dinlənilib. Mühazirədə Tərlan Quliyev əruz elminin qədim köklərə malik olduğunu bildirib, ərəb əruzunun xüsusiyyətlərindən danışıb.
Qeyd edib ki, əruz elmi hələ 767-ci ildə böyük ərəb filoloqu Xəlil ibn Əhməd tərəfindən yaradılıb, o zamana qədər dünya filologiya elmində vəzn haqqında belə bir nəzəri təlim olmayıb. Daha sonra alim ərəb, fars və Azərbaycan poeziyasından əruz vəzninə dair müxtəlif nümunələr təqdim edib.
Şərqşünaslıq fakültəsinin Ərəb filologiyası kafedrasının müdiri dosent Vüqar Qaradağlı, Türk filologiyası kafedrasının müdiri professor Rüfət Rüstəmov, Uzaq Şərq dilləri və ədəbiyyatı kafedrasının müdiri professor Oqtay Cəlilbəyli çıxışlarında Elm Gününün əhəmiyyətini vurğulayıb, ustad dərsinin mövzusu ilə bağlı müzakirələr aparıblar.
Bölmənin digər xəbərləri
