QAN YADDAŞI
Şərqşünaslıq İnstitutunda Xocalı faciəsinin qurbanları yad edilmişdir
Bakı, 24 fevral (AZƏRTAC). Fevralın 24-də AMEA-nın akademik Ziya Bünyadov adına Şərqşünaslıq İnstitutunda Xocalı faciəsinin qurbanları yad edilmişdir.
İnstitutdan AZƏRTAC-a bildirilmişdir ki, tədbirdə Şərqşünaslıq İnstitutunun direktoru, Milli Məclisin deputatı, professor Gövhər Baxşəliyeva fevralın 26-nın Azərbaycan xalqı üçün çox ağrılı bir gün olduğunu bildirmişdir. Xocalı faciəsinin ağır nəticələri barədə danışan G.Baxşəliyeva, xalqımızın bu günü böyük hüzn və kədərlə qeyd etdiyini söyləmişdir.
Ümummilli lider Heydər Əliyevin 2-ci dəfə hakimiyyətə gəlişindən sonra Milli Məclis tərəfindən bu hadisəyə hüquqi-siyasi qiymət verildiyini vurğulayan G.Baxşəliyeva bu yaxınlarda Pakistan və Meksika parlamentlərinin Xocalı faciəsini soyqırımı kimi tanıdığını diqqətə çatdırmışdır. O, bir qədər öncə İslam Əməkdaşlıq Təşkilatının Parlament İttifaqında Xocalı hadisələri ilə bağlı qətnamə qəbul olunduğunu və təşkilata üzv dövlətlərin parlamentlərinə bu məsələnin öz qanunvericiliklərinə əlavə edilməsi ilə bağlı müraciət olunduğunu demişdir.
Tədbirdə institutun əməkdaşları - filologiya elmləri doktoru Vilayət Cəfərov, həmkarlar təşkilatının sədri, hüquq üzrə fəlsəfə doktoru Sultanəli Mirzəzadə, tarix üzrə fəlsəfə doktoru Esmeralda Ağayeva və başqaları Xocalı faciəsinin Azərbaycan xalqını sarsıtdığını, Xocalı sakinlərinə sağalmaz yaralar, mənəvi zərbələr vurduğunu söyləməklə yanaşı, xocalıların amansız soyqırımı günündə də özlərini əsl qəhrəman kimi apardıqlarını qeyd etmişlər.