“SƏS” QƏZETİNİN YUBİLEYİ QEYD OLUNMUŞDUR
Qəzetin kollektivi həmin gün Fəxri xiyabana gələrək, ümummilli liderimiz Heydər Əliyevin xatirəsini anmış, ulu öndərin məzarı önünə əklil qoymuşdur.
Tanınmış oftolmoloq alim, akademik Zərifə xanım Əliyevanın da xatirəsi yad edilmiş, məzarı üstünə gül-çiçək düzülmüşdür.
Sonra qəzetin əməkdaşları milli mətbuatımızın banisi Həsən bəy Zərdabinin məzarını da ziyarət etmiş, böyük maarifçinin xatirəsinə ehtiramlarını ifadə etmişlər.
Sonra Bakı Əyləncə Mərkəzində qəzetin 15 illiyinə həsr olunmuş mərasim keçirilmişdir.
Mərasimi giriş sözü ilə açan baş redaktor Bəhruz Quliyev “Səs” qəzetinin keçdiyi şərəfli yoldan danışaraq demişdir ki, ilk sayından başlayaraq millli və dövlətçilik maraqlarımıza xidmət edən qəzet ümummilli lider Heydər Əliyevin ideyalarının təbliğatçısı olmuşdur və bu ənənə indi də davam etdirilir.
Ulu öndər Heydər Əliyevin “Səs” qəzeti barədə söylədiyi fikirləri səsləndirən videokadrlar böyük maraqla qarşılanmışdır.
Daha sonra Yeni Azərbaycan Partiyası sədrinin müavini, əmək və əhalinin sosial müdafiəsi naziri Əli Nağıyev, Prezidentin İcra Aparatının ictimai-siyasi şöbəsinin müdiri, YAP idarə heyətinin üzvü Əli Həsənov, YAP sədrinin müavini – icraçı katib, Milli Məclisin deputatı Əli Əhmədov, YAP siyasi şurasının üzvü, uzun illər “Səs” qəzetinin baş redaktoru olmuş Ağabəy Əsgərov və YAP icraçı katibinin müavini, Milli Məclisin deputatı Siyavuş Novruzov çıxış edərək, yubiley münasibətilə kollektivi təbrik etmiş, qəzetin tutduğu yola bundan sonra da sadiq olacağına əminliklərini bildirmişlər.
Natiqlər vurğulamışlar ki, ötən illər ərzində “Səs” qəzeti öz dəst-xətti ilə respublikamızın mətbuat orqanları sırasında layiqli yerini tutmuşdur. Əsası Həsən bəy Zərdabi tərəfindən qoyulmuş milli mətbuatımızın ənənələrinə sadiq qalan “Səs” qəzeti müstəqil Azərbaycan dövlətinin, xalqımızın maraqlarını daim uca tutmuş və heç vaxt amalından dönməmişdir.
Müasir Azərbaycan dövlətinin memarı və qurucusu, xalqımızın və müstəqilliyimizin xilaskarı, ulu öndərimiz Heydər Əliyevin vaxtilə dediyi “Qoy, ədalət zəfər çalsın!” sözlərini özünə deviz seçdiyini xatırladan natiqlər dedilər ki, “Səs” qəzeti həmişə Azərbaycanın dahi oğlunun ideyalarının müdafiəçisi və təbliğatçısı kimi çıxış etmişdir.
“Səs” qəzeti hər bir nömrəsində oxucularla görüşə ulu öndərimizin siyasi xəttinin layiqli davamçısı Prezident İlham Əliyevin rəhbərliyi ilə yeni inkişaf mərhələsinə çıxmış Azərbaycanın ictimai-siyasi, sosial-iqtisadi sahələrdə qazandığı uğurları, respublikamızın getdikcə artan beynəlxalq nüfuzu, regionda aparıcı dövlətə çevrilməsi barədə xəbərlərlə gəlir.
Bölmənin digər xəbərləri
