Səudiyyə Ərəbistanının parlamentində Xocalı faciəsinin 23-cü ildönümü qeyd edilib
İstanbul, 25 fevral, AZƏRTAC
Azərbaycan Respublikasının Səudiyyə Ərəbistanı Krallığındakı səfirliyi tərəfindən Xocalı faciəsinin 23-cü ildönümü və tanınması ilə əlaqədar Səudiyyə Ərəbistanı Krallığı Məşvərət Şurasında (parlament) tədbir keçirilib.
Səfirlikdən verilən məlumata görə, tədbirdə Səudiyyə Ərəbistanı-Azərbaycan dostluq qrupunun sədri Abdulla bin Məhəmməd əl-Nasir, deputatlar - xanım Əməl bint Sələmə Əl-Şəmən, xanım Nihad bint Məhəmməd Əl-Ceşi, Səid bin Abdullah Əl-Şeyx, Abdullah bin Əli Əl-Munif, Məhəmməd bin Dəxil Əl-Mutairi, Məhəmməd Saleh Dehaim və digərlər iştirak ediblər.
Səfir Rasim Rzayev çıxışında Azərbaycan və Səudiyyə Ərəbistanı arasında mövcud olan yüksək səviyyəli əməkdaşlığı vurğulayıb. O, Ermənistan-Azərbaycan, Dağlıq Qarabağ münaqişəsinə dair tutduğu prinsipial mövqeyə görə Səudiyyə Ərəbistanına minnətdarlığını ifadə edib, Azərbaycan hökuməti və xalqı tərəfindən bu mövqeyin yüksək qiymətləndirildiyini diqqətə çatdırıb.
Səfir R.Rzayev erməni millətçiləri tərəfindən xalqımıza qarşı aparılmış soyqırımı siyasətinin tərkib hissəsi kimi Xocalıda günahsız əhalinin xüsusi amansızlıqla qətlə yetirilmələrindən söhbət açaraq, həmin faciə zamanı qətlə yetirilmiş, itkin düşmüş və girov götürülmüş insanlar haqqında rəqəmləri açıqlayıb. O, xalqımıza qarşı törədilən bu cinayətin erməni millətçiləri və onların himayədarları tərəfindən planlı şəkildə həyata keçirildiyini bildirib. Diplomat Xocalı soyqırımının törədilməsinə dair siyasi qərarın Ermənistan rəhbərliyi tərəfindən qəbul edilməsi haqqında faktların mövcudluğunu vurğulayaraq, bu faciəni törədənlərin bir qisminin müəyyənləşdirilməsi və onların beynəlxalq mühakiməyə cəlb edilməsi məqsədilə axtarışın elan edildiyini söyləyib.
R.Rzayev Xocalı faciəsinin dünyada, xüsusilə də İslam aləmində tanıdılması və bu soyqırımı hadisəsinin qınanması istiqamətində birgə fəaliyyət görülməsinin zəruriliyini diqqətə çatdırıb.
Daha sonra Səudiyyə Ərəbistanı-Azərbaycan dostluq qrupunun rəhbəri Abdulla Bin Məhəmməd Əl-Nasir çıxışında Xocalı faciəsinin tanınması ilə əlaqədar bu ölkənin parlamentinin rəhbərliyinə təkliflərini bildirib və dostluq qrupu adından yaxın günlərdə Xocalı faciəsi ilə bağlı mətbuatda geniş məqalənin dərc olunacağını bildirib.
Sonra səfirliyin əməkdaşları Ramil İmranov, Samir Məlikli, Elnur Abdullayev, Emil Qasımzadə və İmran Sadıxov çıxış ediblər. Xocalı faciəsinin dünyanın bir çox ölkələrinin parlamentləri tərəfindən tanınması haqqında məlumat verən diplomatlarımız Ermənistan-Azərbaycan, Dağlıq Qarabağ münaqişəsi ilə bağlı beynəlxalq təşkilatlar çərçivəsində Səudiyyə Ərəbistanı rəhbərliyi tərəfindən Azərbaycanın haqlı mövqeyinin daim dəstəkləndiyi qeyd edilib, bu ölkənin Məşvərət Şurası tərəfindən də Xocalı soyqırımının tanınmasının vacibliyi vurğulanıb.
Sonda Qarabağ münaqişəsi, xüsusilə də Xocalı soyqırımını əks etdirən disk, kitab və materiallar, Xocalı soyqırımı ilə əlaqədar səfirliyin pres-relizi, Heydər Əliyev Fondunun vitse-prezidenti Leyla Əliyevanın rəhbərliyi ilə həyata keçirilən “Xocalıya ədalət!” beynəlxalq təbliğat-təşviqat kampaniyasına dair materiallar, Azərbaycan ombudsmanının bəyanatı, Qafqaz Müsəlmanları İdarəsinin sədri şeyxülislam Allahşükür Paşazadə, Bakı və Azərbaycan arxiyepiskopu Aleksandr, Dağ yəhudiləri dini icmasının rəhbəri Milix Yevdayev və Azərbaycandakı Katolik icmasının rəhbəri Vladimir Feketinin dünya dini liderlərinə, parlamentlərə, beynəlxalq təşkilatlara və İnsan Hüquqları üzrə Avropa Məhkəməsinə birgə müraciətlərinin mətni və “İRS” jurnalının Xocalı soyqırımına aid xüsusi buraxılış iştirakçılara paylanıb.
Həmçinin Səudiyyə Ərəbistanı Xarici İşlər Nazirliyinə, İslam Əməkdaşlıq Təşkilatına və Ər-Riyad şəhərində yerləşən diplomatik missiyalara Azərbaycan ombudsmanının bəyanatının, dünya dini liderlərinə, parlamentlərə, beynəlxalq təşkilatlara və İnsan Hüquqları üzrə Avropa Məhkəməsinə dini icmaların rəhbərlərinin birgə müraciətinin və pres-relizin ünvanlanması, İƏT tərəfindən üzv ölkələr arasında müvafiq bəyannamənin yayılması ilə əlaqədar səfirlik tərəfindən müraciətin edilməsi təşkil olunub.
Sabir Şahtaxtı
AZƏRTAC-ın xüsusi müxbiri
İstanbul
Bölmənin digər xəbərləri
