Seul: KXDR 2 min kiloqramadək zənginləşdirilmiş uran ehtiyatına malikdir
Bakı, 25 sentyabr, AZƏRTAC
Şimali Koreya 2 min kiloqrama qədər yüksək səviyyədə zənginləşdirilmiş uran ehtiyatına malikdir.
AZƏRTAC xəbər verir ki, bu barədə Cənubi koreyalı nazir Çon Don Yon mətbuat konfransı zamanı deyib. Onun sözlərinə görə, əldə olunan kəşfiyyat məlumatlarına görə, hazırda Şimali Koreyanın dörd fərqli bölgəsində yerləşən uran sentrifuqaları fəaliyyətini davam etdirir.
“Bu proses dərhal dayandırılmalıdır. Hazırda dörd bölgədə sentrifuqalar işləməyə davam edir və nüvə materialları toplanır”, – deyə “Yonhap” agentliyi nazirdən sitat gətirib.
Çon Don Yon əlavə edib ki, Pxenyan və Vaşinqton arasında danışıqların bərpası KXDR-in nüvəsizləşdirilməsi istiqamətində çıxılmaz vəziyyəti yenidən canlandıra bilər.
Bir müddət öncə KXDR lideri Kim Çen In bəyan edib ki, Pxenyan ABŞ-la danışıqlara hazırdır, lakin bunun üçün Vaşinqton Şimali Koreyanın nüvəsizləşdirilməsi siyasətindən əl çəkməlidir. O, həmçinin Pxenyanın heç bir halda nüvə silahından imtina etməyəcəyini vurğulayaraq, “geridönməz” nüvə dövləti statusunun Şimali Koreya Konstitusiyasında təsbit edildiyini xatırladıb.
Bölmənin digər xəbərləri
