Sezər Huysuz: İslam Oyunları Türkiyə və Azərbaycan üçün xüsusi əhəmiyyət daşıyır
Ər-Riyad, 8 noyabr, AZƏRTAC
İslam Həmrəyliyi Oyunları bizim üçün böyük əhəmiyyət daşıyır. Türkiyə və Azərbaycan üçün belə yarışlar xüsusilə önəmlidir. Bu Oyunlar idmançılara həm ilham verir, həm də ölkələrini layiqincə təmsil etməyə şərait yaradır.
Bu sözləri AZƏRTAC-a müsahibəsində Türkiyə Cüdo Federasiyasının prezidenti Sezər Huysuz deyib.
Onun sözlərinə görə, İslam Həmrəyliyi Oyunlarının tarixi və inkişafı da diqqətəlayiqdir: “Bildiyiniz kimi, bu Oyunlar 2017-ci ildə Azərbaycanda yüksək səviyyədə keçirilmişdi, daha sonra isə Türkiyədə təşkil olunmuşdu. Ümid edirəm ki, gələcəkdə bu yarışlar daha çox ölkəni əhatə edəcək və keyfiyyət baxımından daha yüksək səviyyəyə çatacaq”.
Federasiya rəhbəri bildirib ki, cüdo həm İslam ölkələri, həm də dünya idmanı üçün böyük potensiala malikdir: “Oyunlarda cüdo üzrə yarışlarda 32 ölkədən idmançılar mübarizə aparırlar. Bu amil cüdonun həm çətin, həm də gözəl idman növü olduğunu göstərir. Bizim üçün də cüdonun sadəcə Avropada deyil, bütün dünyada inkişaf etməsi sevindirici haldır. Həmin yarışlarda iştirak etməkdən isə böyük məmnunluq duyuruq. Milli komandamız burada 7-si qadın, 5-i kişi olmaqla, ümumilikdə 12 idmançı ilə təmsil olunur. Bütün çəkilərdə medal götürmək istəyirik”.
S.Huysuz Türkiyə və Azərbaycan cüdo federasiyaları arasında güclü əməkdaşlıq və dostluq münasibətlərinin olduğunu da söyləyib: “Hər iki qurum arasında əlaqələr dinamik şəkildə inkişaf edir”.
Qeyd edək ki, Səudiyyə Ərəbistanının paytaxtı Ər-Riyad şəhərində keçirilən VI İslam Həmrəyliyi Oyunlarının bağlanış mərasimi noyabrın 21-də baş tutacaq.
Bölmənin digər xəbərləri
