İQTİSADİYYAT
Sığortaçılar Assosiasiyasında görüş
![Sığortaçılar Assosiasiyasında görüş](/files/2023/1/1200x630/16787986625440045039_1200x630.jpg)
Bakı, 14 mart, AZƏRTAC
Martın 14-də Azərbaycan Respublikası Prezidentinin Administrasiyasının Qeyri-hökumət təşkilatları ilə iş və kommunikasiya şöbəsinin sektor müdiri Vüsal Quliyev və digər məsul şəxslər Azərbaycan Sığortaçılar Assosiasiyasında (ASA) olub, qurumun rəhbərliyindən ibarət nümayəndə heyəti ilə görüş keçirilib.
ASA-dan AZƏRTAC-a verilən məlumata görə, görüşdə Azərbaycan Sığortaçılar Assosiasiyasının icraçı direktoru Elmar Mirsalayev qonaqlara Assosiasiyanın fəaliyyəti haqqında geniş məlumat verib. Bildirib ki, ASA qısa zamanda Azərbaycan Mərkəzi Bankının da dəstəyi ilə ölkədə sığorta xidmətlərinə əlçatanlığın təmin olunması istiqamətində sektora hərəkətverici layihələrin uğurla realizə olunmasına nail olub. İcraçı direktor qeyd edib ki, məhz bu fəaliyyət istiqamətlərinin səmərəli nəticəsi olaraq yerli sığorta bazarında 2021-ci ildə 16 faiz, 2022-ci ildə isə 15 faiz böyümə qeydə alınıb.
E.Mirsalayev, həmçinin Azərbaycan Sığortaçılar Assosiasiyasının qurduğu uğurlu beynəlxalq əməkdaşlıqlardan da söz açıb. O vurğulayıb ki, Türkiyə ilə əldə olunan ortaq razılıq və birgə təşəbbüs, o cümlədən 5 türk dövlətinin iştirakı ilə dünyada ilk dəfə Türk Dünyası Sığorta Birliyi təsis edilib. Birliyin gələcək fəaliyyət istiqamətlərindən söz açan icraçı direktor xüsusilə bildirib ki, bu Birlik regionda sığorta habının formalaşmasını təmin edən yeganə beynəlxalq təşkilatdır.
Prezident Administrasiyasının Qeyri-hökumət təşkilatları ilə iş və kommunikasiya şöbəsinin sektor müdiri Vüsal Quliyev çıxışında ölkəmizdə QHT-lərin inkişafı istiqamətində yaradılan münbit şəraitdən və təşkilatların bütün sferalarda həyata keçirdikləri aktiv fəaliyyətdən söz açıb. Vüsal Quliyev habelə Azərbaycan Sığortaçılar Assosiasiyasının fəaliyyətini yaxından izlədiyini və yüksək qiymətləndirdiyini bildirib. Qeyd edib ki, Azərbaycan Sığortaçılar Assosiasiyasının son illərdəki aktiv fəaliyyəti və əldə etdiyi nailiyyətlər onu deməyə əsas verir ki, ASA bir QHT-dən daha çox və uğurlu işlər görür.
Görüşdə tərəflər çoxşaxəli fəaliyyət istiqamətlərinin inkişaf etdirilməsi məqsədilə qurumlararası qarşılıqlı əməkdaşlıq istiqamətlərinə də toxunaraq, növbəti mərhələdə birgə layihələrin icrası mövzusunda razılığa gəliblər.