SİLAHLI QÜVVƏLƏR GÜNÜ MÜNASİBƏTİLƏ ZABİT VƏ ƏSGƏRLƏRƏ BAYRAM HƏDİYYƏSİ VERİLMİŞDİR

28.06.2004 [15:49]
Çap et
A⁺ A^-

26 iyun – Azərbaycan Respublikası Silahlı Qüvvələri günü respublikamızın hər yerində olduğu kimi, Şamaxı rayonunda da böyük təntənə ilə qeyd olunmuşdur. Bu münasibətlə rayonda yerləşən “N” saylı hərbi hissədə bayram tədbiri keçirilmişdir.

AZƏRTAC-ın müxbiri xəbər verir ki, bayram tədbirində “N” saylı hərbi hissənin komandir əvəzi Ağəli Hüseynov, Şamaxı Rayon İcra Hakimiyyəti başçısının birinci müavini Nəsimi Abdullayev, rayon gənclər, idman və turizm idarəsinin rəisi Şahmar Hüseynov və digər natiqlər çıxış edərək zabit və əsgərləri təbrik etmişlər. Sonra rayon icra hakimiyyəti tərəfindən göndərilən bayram sovqatı hərbi hissənin zabit və əsgərlərinə təqdim olunmuşdur.

Şamaxı rayon mədəniyyət şöbəsinin bədii özfəaliyyət kollektivi şəxsi heyət qarşısında konsert proqramı ilə çıxış etmişdir.