Şimal-qərb bölgəsinin gənc həkimləri Qəbələdə bir araya gəliblər VİDEO
Qəbələ, 1 sentyabr, AZƏRTAC
Bu gün Azərbaycan Həmkarlar İttifaqları Konfederasiyasının üzv təşkilatı Səhiyyə İşçiləri Həmkarlar İttifaqı Respublika Komitəsinin təşkilatçılığı ilə Qəbələ rayonunda “Gənc Tibb İşçilərinin Konfransı” keçirilib.
AZƏRTAC-ın bölgə müxbiri xəbər verir ki, Heydər Əliyev Konqres Mərkəzində keçirilən tədbirdə Qəbələ, Oğuz, Balakən, Qax, Zaqatala və Şəki şəhər və rayonlarından gənc tibb işçiləri, səhiyyə müəssisələrinin rəhbərləri və əməkdaşları, həmkarlar ittifaqı nümayəndələri, eləcə də dövlət və ictimai qurumların təmsilçiləri iştirak ediblər.
Konfrans Dövlət Himninin səsləndirilməsi və şəhidlərin əziz xatirəsinin bir dəqiqəlik sükutla yad edilməsi ilə başlayıb.
Açılış mərasimində Qəbələ Rayon İcra Hakimiyyətinin başçısı Səbuhi Abdullayev, Səhiyyə İşçiləri Həmkarlar İttifaqı Respublika Komitəsinin sədri Elnara Muradova, Səhiyyə Nazirliyinin Əczaçılıq və tibbi avadanlıqlar şöbəsinin müdiri Şahbala Yaqubov, TƏBİB Təlimlərin idarə olunması şöbəsinin müdiri Emil İskəndərov eləcədə digər dövlət və ictimai qurumların nümayəndələri çıxış ediblər. Çıxışlarda gənclərin ölkənin sosial-iqtisadi inkişafındakı rolu, səhiyyə sektorunda gənc kadrların potensialı, onların peşəkar inkişafının dəstəklənməsi və regionlarda fəaliyyət göstərən gənc tibb işçiləri üçün əlverişli imkanların yaradılmasının əhəmiyyəti vurğulanıb.
Konfrans çərçivəsində “Səhiyyə gəncləri üçün peşəkar çağırışlar” və “Gənclərin regionlarda inkişaf yolu” mövzularında panel müzakirələri keçirilib. Panel müzakirələrində gənc tibb işçilərinin karyera planlaması, davamlı peşəkar inkişaf, psixoloji rifahın qorunması, əmək və peşə fəaliyyəti zamanı qarşılaşılan hüquqi risklər, xəstə hüquqlarının müdafiəsi, regionlarda fəaliyyət göstərən tibb müəssisələrində mövcud problemlər, eləcə də gənc kadrların bölgələrdə davamlı məşğulluğunun təşviqi məsələləri müzakirə olunub. Müzakirələrdə səhiyyə müəssisələrinin rəhbərləri, həkimlər, hüquqşünaslar, həmkarlar ittifaqı nümayəndələri və gənc tibb işçiləri iştirak edərək mövzular ətrafında fikir və təcrübə mübadiləsi aparıblar.
Tədbirin interaktiv hissəsində “Gənc Tibb İşçiləri arasında İntellektual Yarış” təşkil olunub. Yarış zamanı iştirakçılar tibbi biliklərlə yanaşı, analitik düşünmə, klinik qərarvermə, etik yanaşma və komanda işi bacarıqlarını nümayiş etdiriblər. Yarışın nəticələrinə əsasən qalib komanda müəyyənləşdirilib. Qalib komandaya kubok və hədiyyə paketi, bütün iştirakçılara isə iştirak sertifikatları təqdim olunub.
Azərbaycan Səhiyyə İşçiləri Həmkarlar İttifaqı Respublika Komitəsinin sədri Elnarə Muradova AZƏRTAC-ın bölgə müxbiri ilə söhbətində bildirib ki, bu konfrans gənc tibb işçiləri arasında təcrübə mübadiləsinin aparılması, regional əməkdaşlığın genişləndirilməsi və peşəkar şəbəkələşmənin gücləndirilməsi baxımından mühüm platforma olub. Komitə sədri sözlərinə onu da əlavə edib ki, tədbir Azərbaycan Səhiyyə İşçiləri Həmkarlar İttifaqı Respublika Komitəsinin gənc tibb işçilərinin peşəkar inkişafını, sosial rifahını və regionlarda fəaliyyətlərinin davamlılığını dəstəkləməyə yönəlmiş silsilə regional layihələri çərçivəsində keçirilib.
Müxbir - Rasim İslamoğlu
Bölmənin digər xəbərləri
