Soltan Məmmədov: Ağdamın hərbi əməliyyatlarsız işğaldan azad olunması böyük diplomatik qələbəmizdir
Bakı, 19 noyabr, AZƏRTAC
Ağdam rayonunun işğaldan azad olunması Müzəffər Ali Baş Komandanın rəhbərliyi ilə Azərbaycan Ordusunun Vətən müharibəsində qazandığı tarixi Qələbənin siyasi müstəvidə təsdiqi idi. Azərbaycan, Rusiya və Ermənistan rəhbərlərinin imzaladığı üçtərəfli Bəyanatın nəticəsində Ermənistan silahlı qüvvələri Ağdamı tərk etməyə məcbur oldu. Bu, Azərbaycanın həm də diplomatik müstəvidə qazandığı tarixi nailiyyətdir.
Bunu AZƏRTAC-a açıqlamasında Milli Məclisin deputatı Soltan Məmmədov deyib.
Ağdamın Ermənistan tərəfindən işğal edilmiş rayonlar arasında əhali sayına görə ən böyük rayon olduğunu xatırladan deputat bildirib ki, rayon həm də hərbi baxımdan böyük strateji əhəmiyyətə malik idi: “Ermənistan 30 il ərzində bu ərazidə çox güclü istehkamlar qurmuşdu. Bundan başqa, bildiyiniz kimi, bu il iyunun 12-də Ermənistan Ağdam rayonu ərazisində 97 min tank və piyada əleyhinə minalara dair xəritələri Azərbaycana təhvil verib. Bu xəritələrin reallığı yalnız 25 faiz əks etdirdiyini nəzərə alsaq, belə qənaətə gəlmək olar ki, rayon ərazisində daha çox mina basdırılıb. Bütün bunlar təbii ki, proseslərin hərb ssenarisi ilə davam edəcəyi təqdirdə Azərbaycan Ordusunun işini xeyli çətinləşdirə, böyük itkilərə səbəb ola bilərdi. Bu baxımdan Ağdamın hərbi əməliyyatlarsız işğaldan azad olunması böyük diplomatik qələbəmizdir”.
Ermənistanın 30 ilə yaxın müddətdə Ağdamda böyük dağıntılar törətdiyini qeyd edən Soltan Məmmədov bildirib ki, bu gün Azərbaycan dövlətinin Ağdamda, eləcə də işğaldan azad olunmuş digər ərazilərdə həyata keçirdiyi quruculuq işləri dövlətimizin gücünü, xalqımızın iradəsini nümayiş etdirir: “Ağdamı bir çoxları Qafqazın Xirosiması adlandırırdılar. Bu gün biz həmin ərazilərə səfər edərkən öz gözlərimizlə bu rayonda hansı miqyasda və amansızlıqla dağıntıların törədildiyinin şahidi oluruq. Lakin indi Ağdamda insanların məskunlaşması, normal həyat şəraitinin yaradılması istiqamətində işlər həyata keçirilir. Müxtəlif profilli müəssisələrin fəaliyyət göstərəcəyi Ağdam Sənaye Parkının təməli qoyulub. Şəhərin içərisində isə 125 hektar sahəni əhatə edən böyük bir meşə zolağı salınacaq. Ağdamda 1750 fərdi ev, 23 min mənzilin inşası nəzərdə tutulur. İlkin mərhələdə 33 kəndin bərpasına başlanması gözlənilir. Hesab edirəm ki, bütün bunlar Azərbaycan dövlətinin işğaldan aza dolunmuş ərazilərdə həyata keçirdiyi quruculuq işlərinin miqyası barədə təsəvvür yaradır”.
Bölmənin digər xəbərləri
