Son illər formalaşan kibertəhlükəsizlik ekosistemi Azərbaycan üçün dayanıqlı müdafiə mühiti yaradıb
Bakı, 23 aprel, AZƏRTAC
Azərbaycanın kibertəhlükəsizlik ekosistemi dayanıqlı strategiyalarla dəstəklənməlidir.
Bu sözləri AZƏRTAC-a açıqlamasında Azərbaycan Kibertəhlükəsizlik Mərkəzinin İnformasiya təhlükəsizliyi departamentinin müdiri Şahmar Hacıyahyayev söyləyib.
O, ölkənin kibertəhlükəsizlik ekosistemi və gənclərin bu sahədəki rolu barədə fikirlərini bölüşüb. Qeyd edib ki, qlobal miqyasda artan kibertəhdidlər fonunda ölkə səviyyəsində effektiv kibertəhlükəsizlik strategiyalarının hazırlanması və tətbiqi zəruridir: “Azərbaycanda kiberrisklərin qiymətləndirilməsi və idarə olunması istiqamətində hazırlanmış strateji yanaşmalar bu sahənin inkişafına güclü dəstək verir. Son illər ərzində formalaşan kibertəhlükəsizlik ekosistemi ölkəmiz üçün dayanıqlı müdafiə mühiti yaradıb”.
Ş.Hacıyahyayev vurğulayıb ki, gənclərin qlobal rəqəmsal dünyada qarşılaşdıqları kibertəhdidlərin mahiyyətini dərk etməsi və onlara qarşı düzgün cavab mexanizmlərini mənimsəməsi bu sahədə başlıca prioritetlərdən biridir: “Bu kimi forumlar gənclərə kibertəhlükələrin zərərini başa düşmək, həmçinin onlara qarşı hansı müdafiə alətlərindən istifadə edilməli olduğunu öyrənmək baxımından çox faydalıdır. Burada keçirilən simulyasiya sessiyaları, eləcə də panel müzakirələr vasitəsilə iştirakçılar həm biliklərini genişləndirir, həm də öz suallarını ekspertlərə ünvanlayaraq real təcrübə əldə edirlər”.
O əlavə edib ki, bu cür tədbirlər gənclərin yalnız akademik və nəzəri biliklərini artırmaqla kifayətlənmir, eyni zamanda, onların gələcək peşə həyatında və şəxsi fəaliyyətlərində rastlaşa biləcəkləri kibertəhdidlərə qarşı operativ və effektli cavab tədbirləri formalaşdırmalarına şərait yaradır. Ş.Hacıyahyayev bu kimi təşəbbüslərin davamlı olaraq keçirilməsinin Azərbaycan kibertəhlükəsizliyi sahəsinin inkişafında mühüm rol oynayacağını qeyd edib.
Bölmənin digər xəbərləri
