Sorğu: Britaniyada mühafizəkarları ağır seçki məğlubiyyəti gözləyir
Bakı, 4 aprel, AZƏRTAC
Böyük Britaniyanın Leyboristlər Partiyası qarşıdakı parlament seçkilərində 400-dən çox yerlə hakimiyyətə gələ bilər.
AZƏRTAC xəbər verir ki, bu barədə proqnoz YouGov sosiologiya institutunun son rəy sorğusunun nəticələrində əksini tapıb. Belə ki, 18 min britaniyalı arasında keçirilən sorğuya görə, leyboristlər parlamentdə rəqiblərinin 2019-cu ildə qazandığı nəticədən təxminən iki dəfə çox yer götürə bilərlər. Yəni leyboristlər 403, mühafizəkarlar isə cəmi 155 mandata sahib ola bilər. Bu o deməkdir ki, Mühafizəkarlar Partiyasını 1997-ci ildəkinə nisbətən daha ağır məğlubiyyət gözləyir. O vaxt Leyboristlər Partiyasının böyük qələbəsi nəticəsində mühafizəkarların parlamentdə cəmi 165 deputatı qalmışdı.
Mühafizəkarlar həmin məğlubiyyətdən yalnız 18 il sonra, 2015-ci ildə təkbaşına hökumət qura bilmişdi. O zaman parlament seçkilərindəki qələbə Böyük Britaniyanın Avropa İttifaqından çıxması ideyası fonunda əldə edilmişdi.
Qeyd edək ki, Böyük Britaniyanın Baş naziri Rişi Sunak ölkədə parlament seçkilərinin bu ilin ikinci yarısında keçirilə biləcəyini bəyan edib.
Bölmənin digər xəbərləri
