QAN YADDAŞI
Soyqırımı qurbanlarının xatirəsi Dövlət Sərhəd Xidməti Akademiyasında ehtiramla yad edilmişdir
Bakı, 31 mart (AZƏRTAC). Azərbaycanlıların Soyqırımı Günü ilə əlaqədar Azərbaycan Respublikası Dövlət Sərhəd Xidməti Akademiyasında anma mərasimi keçirilmişdir.
Mərasimdə akademiyanın zabit, gizir, müəllim, kursant heyəti ilə yanaşı Milli Məclisin deputatları Aydın Mirzəzadə və Fuad Muradov da iştirak etmişlər.
Əvvəlcə soyqırımı qurbanlarının xatirəsi yad olunmuşdur.
Sonra Milli Məclisin deputatları və başqaları çıxış etmiş, zaman-zaman xalqımızın başına gətirilmiş faciələrdən danışmışlar. Soyqırımı siyasətindən söhbət açan natiqlər bildirmişlər ki, ermənilərin xalqımıza qarşı həyata keçirdiyi qırğınlar dünya ictimaiyyəti tərəfindən hüquqi-siyasi qiymətini almalıdır. Ermənilərin məkrli siyasəti bu gün də davam etməkdədir. 1992-ci ilin fevralında törədilən Xocalı soyqırımı bunun ən bariz nümunəsidir. Biz bu həqiqətlərin dünya ictimaiyyətinə çatdırılması istiqamətində fəaliyyətimizi davam etdirməliyik.
Bir fikir xüsusi vurğulanmışdır ki, vətənimizin sərhədlərini qoruyan hərbiçilərimiz məkrli düşmənə qarşı hər zaman mübarizəyə hazır olmalıdırlar.