“SpaceX” kompaniyası orbitə daha 26 internet peyki çıxarıb
Bakı, 13 may, AZƏRTAC
“SpaceX” şirkətinin “Falcon 9” raket daşıyıcısı qlobal internet şəbəkəsi üçün nəzərdə tutulan “Starlink” peyklərinin növbəti qrupunu orbitə çıxarıb.
AZƏRTAC xəbər verir ki, şirkətin saytında yerləşdirilən məlumata görə, yerətrafı orbitə daha 26 minipeyk çıxarılıb.
Daşıyıcı raket bazar ertəsi günü ABŞ-ın Sakit okean sahilləri vaxt ilə saat 18:15-də Kaliforniya ştatında yerləşən Vandenberq bazasından start götürüb.
Qeyd edək ki, “SpaceX” 2019-cu ilin mayından bəri kosmik fəzaya ümumilikdə 8,5 mindən çox peyk buraxıb. Hazırda onların 7,3 mindən çoxu işlək vəziyyətdədir.
Dünyanın ən böyük peyk operatoru olan “SpaceX” orbitə ümumilikdə 12 minə yaxın minipeyk çıxarmağı hədəfləyir. Təxminən 10 milyard dollara başa gələcək layihə planetin istənilən guşəsində genişzolaqlı internetə çıxışı təmin etməyə imkan yaradacaq. Şirkət növbəti mərhələdə orbital qruplaşmadakı kosmik aparatların sayını 34 minə çatdırmağı planlaşdırır.
Hazırda “Starlink” peyk şəbəkəsi dünyanın 40-dan çox ölkəsində, o cümlədən Şimali Amerika, Avropa, Uzaq Şərq və Avstraliyada istifadəçilər üçün əlçatandır. Pentaqonun məlumatına əsasən, həmin peyklərin xidmətindən amerikalı hərbçilər də istifadə edirlər.
Bölmənin digər xəbərləri
