Strasburqda Xocalı soyqırımı qurbanlarının xatirəsi anılmışdır
Strasburq, 25 fevral (AZƏRTAC). Azərbaycanın Avropa Şurası (AŞ) yanındakı daimi nümayəndəliyindən bildirmişlər ki, Heydər Əliyev Fondunun dəstəyi və daimi nümayəndəliyin təşkilatçılığı ilə fevralın 24-də Strasburqda Xocalı soyqırımının 20-ci ildönümünə həsr olunmuş tədbir keçirilmişdir.
Tədbirdə Azərbaycan və türk diaspor təşkilatlarının, Türkiyənin və GUAM ölkələrinin AŞ yanında daimi nümayəndələrinin, Türkiyənin bu şəhərdəki baş konsulunun, Strasburq Universitetinin ziyalılarının, yerli və xarici qonaqların, eləcə də Strasburqda yaşayan soydaşlarımız iştirak etmişlər.
Mərasimdən əvvəl Xocalı qətliamı qurbanlarının xatirəsinə ehtiram əlaməti olaraq Azərbaycanın Avropa Şurasının iqamətgahı qarşısındakı bayrağının önünə əklil qoyulmuş və erməni vəhşiliyinin qurbanı olmuş xocalıların xatirəsi bir dəqiqəlik sükutla yad edilmişdir.
Sonra tədbir Avropa Parlamentlər Assosiasiyasının binasında davam etdirilmişdir.
Mərasim iştirakçılarına Xocalı soyqırımının, eləcə də Ermənistan-Azərbaycan, Dağlıq Qarabağ münaqişəsinin tarixinə dair Heydər Əliyev Fondu tərəfindən müxtəlif dillərdə nəşr edilmiş əyani və videomateriallar təqdim olunmuş, ermənilərin xalqımıza qarşı törətdikləri cinayətlər haqqında, habelə “Xocalıya ədalət!” beynəlxalq kampaniyası haqqında ətraflı məlumat verilmişdir.
Tədbirdə Xocalı soyqırımından bəhs edən filmi nümayiş olunmuşdur.
Mərasimdə daimi nümayəndəliyin rəhbəri, səfir Arif Məmmədov ermənilərin xalqımıza qarşı törətdikləri soyqırımı, insanlıq tarixinin ən dəhşətli cinayətlərindən biri olan Xocalı faciəsinin əsl mahiyyəti barədə danışmış, Heydər Əliyev Fondunun Azərbaycan həqiqətləri, o cümlədən Xocalı faciəsi barədə dünya və Avropa ictimaiyyətinə ətraflı və düzgün məlumat vermək sahəsində apardığı işləri diqqətə çatdırmışdır.
A.Məmmədov qeyd etmişdir ki, fevralın 24-də Elzas regionunun əsas mətbu orqanı olan “Dernières Nouvelles d'Alsace” (“Elzasın son xəbərləri”) qəzetində Azərbaycan ilə bağlı, o cümlədən Xocalı soyqırımından bəhs edən məqalələrin işıq üzü görməsi təcavüzkar ermənilərin əsl simaları barədə beynəlxalq ictimaiyyətin, o cümlədən fransız xalqının məlumatlandırılması baxımından mühüm əhəmiyyət daşıyır. O, faciənin dünya ölkələri tərəfindən soyqırımı kimi tanınması istiqamətində səyləri artırmağın vacibliyini diqqətə çatdırmışdır.
Prezident Administrasiyasının sektor müdiri Qafar Əliyev Azərbaycan hökumətinin bu məsələni daima gündəmdə saxladığını, beynəlxalq ictimaiyyət tərəfindən bu hadisələrə düzgün və obyektiv qiymət verilməsi istiqamətində ciddi iş apardığını bildirmişdir. O, Azərbaycan və türk diaspor təşkilatlarının bu sahədə birgə fəaliyyətinin vacibliyini qeyd etmiş və bu gün Azərbaycanın əsas məsələsinin torpaqlarımızın işğaldan azad edilməsi və ərazi bütövlüyümüzün bərpası olduğunu söyləmişdir.
Azərbaycanlılar və digər Türkdilli Xalqların Əməkdaşlığı Mərkəzinin sədri İlham İsmayılov, Milli QHT Forumunun sədri Rauf Zeyni və başqaları çıxışlarında Xocalı soyqırımında əli olanların indiyədək cəzasız qalmalarına toxunmuş və faciəni törədənlərin məsuliyyətə cəlb edilməsi istiqamətində konkret addımların atılması vaxtının çatdığını bildirmişlər. Onlar Azərbaycan həqiqətlərinin təbliğində xaricdə təhsil alan azərbaycanlı tələbələrin önəmli rol oynaya biləcəklərini diqqətə çatdırmışlar.
Mərasimdə çıxış edən Türkiyənin AŞ yanında daimi nümayəndəsi Azərbaycanın sevincinin Türkiyənin sevinci, Azərbaycanın kədərinin Türkiyənin kədəri olduğunu qeyd etmiş və bu faciənin öz soydaşlarına qarşı törədilən faciə kimi qəbul edildiyini vurğulamışdır.
Mərasimin sonunda faciə qurbanlarının ruhuna ehsan süfrəsi açılmışdır.
Əsgər Əliyev
AZƏRTAC-ın xüsusi müxbiri
Strasburq
Bölmənin digər xəbərləri
