SUMQAYITDA MUZEY BAHARI
Muzeyin direktoru Olya İslamzadə AZƏRTAC-ın müxbirinə bildirmişdir ki, bu beynəlxalq tədbir 1999-cu ildən bəri Fransa muzeylərinin təşəbbüsü ilə hər il may ayının birinci bazar günü keçirilir. Onun iştirakçıları Azərbaycan muzeylərinin də daxil olduqları Beynəlxalq Muzey Komitəsinin (BMK) üzvləridir.
Hazırkı tədbir “Tarixlərin tarixi” mövzusuna həsr olunmuşdur. Bununla əlaqədar, 35 ildən çox fəaliyyət göstərən Sumqayıt Tarix Muzeyi Ermənistan silahlı qüvvələrinin işğal etdikləri Azərbaycanın əzəli torpaqlarından çıxarılmış zəngin qədim məişət əşyaları kolleksiyasını nümayiş etdirir. Məlumdur ki, erməni təcavüzünün qurbanları təkcə insanlar yox, həm də tarix-memarlıq abidələri olmuşdur. Hazırda tariximizin və mədəniyyətimizin nadir abidələri saxlanılan 22 muzey əsirlikdədir. Ona görə də tarix müəllimi Baxşeyiş Alimşahovun növbəti deportasiya zamanı Ermənistandan çıxardığı və yüksək vətənpərvərlik hissinin parlaq nümunəsi olan “Bir elin harayı” kolleksiyası Sumqayıt Tarix Muzeyinin fəxri sayıla bilər. Bu kolleksiyada XII əsrə aid təxminən 60 məişət əşyası nümayiş etdirilir.
Tarix muzeyinə toplaşanlar ümummilli liderimiz, unudulmaz Prezident Heydər Əliyevin Sumqayıt və sumqayıtlılarla əlaqələrindən söhbət açan fotosərgi ilə də tanış olmuşlar.
Bölmənin digər xəbərləri
