Sumqayıt, 27 sentyabr, Ətrabə Rzayeva, AZƏRTAC

Ölkəmizin hər yerində olduğu kimi, sentyabrın 27-də Anım Günündə saat 12:00-da Sumqayıtda da Vətənimizin ərazi bütövlüyü uğrunda canlarını fəda edən şəhidlərin xatirəsi bir dəqiqəlik sükutla yad edilib. Nəqliyyat vasitələrinin və piyadaların hərəkəti dayandırılıb.

AZƏRTAC xəbər verir ki, yaşından asılı olmayaraq hər kəs igid qəhrəmanların xatirəsini anmaq üçün şəhərdəki Şəhidlər xiyabanını ziyarət edib.

Anım Günü münasibətilə keçirilən tədbirdə Sumqayıt Şəhər İcra Hakimiyyəti, hüquq-mühafizə orqanlarının rəhbərləri, YAP şəhər təşkilatının sədri, ağsaqqallar, şəhid ailələri, qazilər, idarə, müəssisə və təşkilatların kollektivləri, həmçinin ictimaiyyət nümayəndələri iştirak ediblər.

Şəhidlər xiyabanında ucalan Qalib Əsgər abidəsi ziyarət edilib, önünə gül dəstələri düzülüb, şəhidlərin əziz xatirəsi ehtiramla anılıb.

Sonra Sumqayıt Şəhidlər xiyabanında uyuyan 519 şəhidin məzarları ziyarət olunub.

Şəhidlərin ailə üzvləri ilə söhbət zamanı göstərilən qayğı və diqqətə görə Prezident İlham Əliyevə və Birinci vitse-prezident Mehriban xanım Əliyevaya minnətdarlıq ifadə olunub.

Şəhidlərin adına ehsan verilib.