SUMQAYITDA ÜMUMDUNYA DƏNİZ GÜNÜNƏ HƏSR OLUNMUŞ AKSİYA KEÇİRİLMİŞDİR
Sumqayıt, 28 sentyabr (AZƏRTAC). Sentaybrın 28-də Sumqayıtda “Azərikimya” İstehsalat Birliyi rəhbərliyinin himayəsi ilə Ümumdünya Dəniz Gününə həsr olunmuş aksiya keçirilmişdir. Tədbir iştirakçıları arasında Sumqayıt məktəbliləri, habelə “Torpaq və su modulu” seminarında iştirak etmək üçün Sumqayıtın tərəfdaş şəhəri Lüdviqshafendən gəlmiş nümayəndə heyəti də var idi. 1978-ci ildə BMT Hökumətlərarası Dəniz Məşvərət Təşkilatının 10-cu iclasında bu gün BMT-nin ümumdunya və beynəlxalq günləri siyahısına daxil edilmişdir. Dəniz günü hər il sentyabrın sonuncu həftəsində qeyd olunur. Konkret gün hər ölkənin hökuməti tərəfindən müəyyən edilir.
Ümumdünya Dəniz Günü münasibətilə Sumqayıt Dövlət Rəsm Qalereyasının qarşısındakı meydanda aksiyanın açılışı olmuşdur. “Azərikimya” İstehsalat Birliyinin baş direktoru Muxtar Babayev Ümumdunya Dəniz Gününün məqsəd və vəzifələrindən danışmış, ekologiyanın cəmiyyətin həyatında və iqtisadiyyatın inkişafında əhəmiyyətini qeyd etmişdir. O, Azərbaycan Prezidenti İlham Əliyevin təşəbbüsü ilə elan olunmuş “Ekologiya ili” çərçivəsində tədbirin aktuallığını vurğulamışdır. Böyüməkdə olan nəslin ekoloji mədəniyyətinin və dünyagörüşünün formalaşmasında maarifləndirmə işinin əhəmiyyəti diqqətə çatdırılmışdır. Sumqayıt dəniz kənarında yerləşir və Xəzər akvatoriyasının, çimərliklərin, sahilyanı zonanın təmizliyi hamının, o cümlədən gənc sumqayıtlıların işidir.
ADRNŞ-in Ekologiya İdarəsinin şöbə rəisi Füzuli Hacıyev, “Azərikimya” İB həmkarlar ittifaqı komitəsinin sədri Vaqif Ömərov və başqaları çıxış edərək ümidvar olduqlarını bildirmişlər ki, bu cür tədbirlər şagirdlərin bilik səviyyəsini artırır, uşaqları təbiəti mühafizə istiqamətində fəal və səmərəli iştiraka, öz şəhərini sevməyə, ətraf mühitə qayğı ilə yanaşmağa ruhlandırır.
Sonra aksiya iştirakçılarına xatirə hədiyyələri və lazımi avadanlıq təqdim olunmuş və onlar Xəzər sahilinə yollanmışlar. Bir neçə saat ərzində dörd qrupa bölünmüş şagirdlər dəniz sahilindən zibil və məişət tullantılarını təmizləmişlər. Fərqlənən gənc ekoloqlara diplomlar təqdim olunmuşdur.
Qeyd edək ki, bu, “Azərikimya” İB-in “Ekologiya ili” çərçivəsində həyata keçirdiyi ikinci tədbirdir. İyunun əvvəllərində ARDNŞ-in himayəsi ilə Sumqayıtda ekoloji forum keçirilmişdir. Forum şərçivəsində uşaqların “Ekologiya və ətraf mühitin mühafizəsi - təbiət bizim sərvətimizdir” mövzusunda rəsm müsabiqəsi, “Elmi-texniki tərəqqi və ekologiya” mövzusunda inşa müsabiqəsi, habelə “Tullantıların ikinci həyatı” mövzusunda layihə müsabiqəsi keçirilmişdir.
######
Bölmənin digər xəbərləri
