Surra məntəqəsində Kür çayının səviyyəsi 123 santimetr qalxıb VİDEO
Sabirabad, 26 mart, Aydın Yavərzadə, AZƏRTAC
Son günlər Kür çayında suyun səviyyəsi qalxıb. Buna səbəb bir neçə gündür fasiləsiz yağan yağışlardır. Kür çayında suyun səviyyəsində olan artım martın ikinci on günlüyündən etibarən müşahidə edilir. Bununla yanaşı, çayın axını da xeyli sürətlənib. Bir müddət əvvəl su azlığı zamanı əmələ gələn kiçik adalar da yoxa çıxıb.
Milli Hidrometeorologiya Xidmətinin Hidrologiya Mərkəzinin direktoru Asif Verdiyev Kür çayında suyun artması ilə bağlı AZƏRTAC-ın bölgə müxbirinə açıqlamasında deyib: “Martın ikinci on günlüyündən etibarən yağan yağışlarla əlaqədar çaylarda, o cümlədən Kür çayında sululuq artıb. Kür çayının aşağı axınında suyun səviyyəsi martın əvvəlində müşahidə olunan minimal səviyyələrdən xeyli yüksəlib. Belə ki, Yevlax məntəqəsində 22 sm, Zərdabda 82 sm, Surrada 123 sm, Şirvanda 108 sm, Salyanda 112 sm, Bankədə 37 sm, Kür çayına tökülən Araz çayının Novruzlu məntəqəsində 63 sm çox olub. Martın əvvəlində Kür çayının Surra məntəqəsində sululuq 22 metrkub/saniyə təşkil edirdisə, düşən yağıntılarla əlaqədar sululuq artaraq hazırda 114 metrkub/saniyə təşkil edir. Nəticədə çayda duzluluq azalaraq norma daxilində olub. Aparılan monitorinqlərin nəticələrinə əsasən Kürün aşağı hissələrində duzluluq azalıb və normada olduğu müşahidə edilir. Bundan başqa, qarşıdan yaz-yay gursululuq dövrü gəlir, həmin dövrdə havanın temperaturunun yüksəlməsi nəticəsində dağlarda qarın tədricən əriməsi və yağan yağışlarla əlaqədar çaylarda, o cümlədən Kürə tökülən çaylarda sululuğun artıması gözlənilir. Artıq dağlıq ərazilərdə qarölçmə işləri başa çatıb, hazırda hesablamalar və təhlillər aparılır. Martın sonunda yaz-yay gursululuq dövrü üzrə proqnozlar tərtib olunaraq müvafiq qurumlara təqdim olunacaq”.
Kür çayında müşahidə olunan su səviyyəsinin artması çay boyunca yerləşən kəndlərin sakinlərini sevindirir. Surra sakini Tərxan Poladov deyib ki, mövcud vəziyyət həm içməli su, həm də əkin sahələrinin suvarılması üçün işlərə müsbət təsir edir. “Son vaxtlar Kürün xeyli aşağı düşməsi sakinləri narahat edirdi, çünki heç vaxt çay belə səviyyədə olmamışdı. Əvvəlki illərdə Kürün düşməsi baş versə də, sonuncu mənzərələr görünməyən bir hal idi. Hətta çay o səviyyədə enmişdi ki, adalar yaranmışdı. Lakin indi su öz səviyyəsini alıb və bu, sevindirici haldır”, - deyə kənd sakini bildirib.
Meliorasiya və Su Təsərrüfatı ASC-nin nümayəndəsi Vidadi Babayev isə qeyd edib ki, Kürdə suyun səviyyəsinin qalxması çay ətrafında yerləşən su nasos stansiyalarının da fəaliyyətinə müsbət təsir edib və aqreqatların su götürmə qabiliyyəti yaxşılaşıb. “Fəaliyyəti dayandırılan aqreqatların da iş prinsipi bərpa edilib. Hazırda 88 nasos stansiyası var ki, bunların 80-i Kürdən qidalanan və çaydan suyu mexaniki üsulla götürən nasos stansiyalarıdır. Kürdə suyun səviyyəsi qalxdığı üçün nasos stansiyaları normal vəziyyətdə işləyir və normal qaydada su götürür”,- deyə ASC-nin nümayəndəsi söyləyib.
Bölmənin digər xəbərləri
