Şuşa uğrunda canını fəda edən qəhrəman - şəhid Rəşid Məmmədov VİDEO
Lənkəran, 24 oktyabr, İlkin Adıyev, AZƏRTAC
Azərbaycanın ərazi bütövlüyü uğrunda gedən döyüşlərdə canını fəda edən igidlərimizdən biri də şəhid Rəşid Məmmədovdur. O, Vətən torpaqlarının azad edilməsi uğrunda aparılan hərbi əməliyyatlarda iştirak edib, göstərdiyi şücaət və fədakarlığı ilə yadda qalıb.
AZƏRTAC-ın bölgə müxbiri xəbər verir ki, Rəşid Məmmədov 1997-ci il noyabrın 20-də Lənkəran rayonunun Sütəmurdov kəndində anadan olub. O, 2005-ci ildə Sütəmurdov kənd tam orta məktəbinin birinci sinfinə qəbul olunub və 2018-ci ildə həmin məktəbi uğurla bitirib.
Orta təhsilini başa vurduqdan sonra Rəşid həqiqi hərbi xidmətə çağırılıb və Azərbaycan Sülhməramlı Qüvvələrində xidmət edib. Xidmət müddətində rabitəçi vəzifəsində çalışıb. 2020-ci ilin may ayında müddətdən artıq həqiqi hərbi xidmət keçmək qərarına gələrək xüsusi təlim kurslarını tamamlayıb və MAXE (müddətdən artıq xidmət edən hərbi qulluqçu) kimi yenidən Vətənə xidmətə başlayıb.
Rəşid Məmmədov 2020-ci il sentyabrın 27-də başlayan və 44 gün davam edən Vətən müharibəsində igidliklə vuruşub. O, döyüş meydanında qorxu bilməyən, cəsarəti və iradəsi ilə seçilən hərbi qulluqçulardan olub. Şuşa istiqamətində gedən ən ağır və həlledici əməliyyatlarda iştirak edərək düşmənə ciddi zərbələr endirib, bir çox strateji mövqelərin azad edilməsində mühüm rol oynayıb.
Şəhidin atası Rəşad Məmmədov oğlunun qəhrəmanlığı ilə qürur duyduğunu bildirir: “Rəşid uşaqlıqdan mərd, vicdanlı və vətənpərvər idi. Sakit, təvazökar, amma çox iradəli bir uşaq idi. Hərbi formanı sadəcə iş geyimi kimi deyil, şərəf rəmzi kimi qəbul edirdi. O, hərbi formanı geyinərkən deyirdi ki, bu geyim mənim kimliyimdir. Müharibə zamanı az-az zəng edirdi, amma hər dəfə “narahat olmayın, hər şey yaxşı olacaq” deyirdi. Oğlum şəhidlik zirvəsinə ucaldı. Ağrılı olsa da, fəxr edirəm ki, o, ən uca məqama yüksəldi”.
Anası Gülşən Məmmədova isə gözyaşları içində oğlunu belə xatırlayır: “Rəşid mənim həyatımın mənası idi. Çox mehriban, ürəyi təmiz bir uşaq idi. Hərbi formanı geyinəndə elə sevinirdi ki, sanki bütün arzularına çatmışdı. Axırıncı dəfə danışanda dedi ki, ana, tezliklə qələbə olacaq, Şuşanı alacağıq. O zaman bilmirdim ki, bu, son danışığımız olacaq... Rəşid şəhid oldu, amma ruhu yaşayır. Mən hər səhər onun qoxusunu hiss edirəm. Qapı açılanda, elə bilirəm o, içəri girəcək. Oğlum Vətən üçün canını fəda etdi və mən bununla fəxr edirəm”.
2020-ci il oktyabrın 29-da Şuşa uğrunda gedən şiddətli döyüşlər zamanı Rəşid Məmmədov mərdliklə vuruşaraq qəhrəmancasına şəhid olub. Nəşi doğulub boya-başa çatdığı Sütəmurdov kəndinə gətirilib və kənd qəbiristanlığında izdihamla torpağa tapşırılıb.
Şəhid Rəşid Məmmədov Azərbaycan Respublikası Prezidentinin müvafiq sərəncamlarına əsasən “Vətən uğrunda”, “Hərbi xidmətlərə görə” və “Şuşanın azad olunmasına görə” medalları ilə təltif edilib.
Bölmənin digər xəbərləri
