CƏMİYYƏT
Tahir Rzayev: Fərdi təsərrüfatlara üstünlük verilməsi ciddi çətinliklər yaradır
![Tahir Rzayev: Fərdi təsərrüfatlara üstünlük verilməsi ciddi çətinliklər yaradır](/files/2023/1/1200x630/16787822491271948188_1200x630.jpg)
Bakı, 14 mart, AZƏRTAC
İqlim dəyişikliyi nəticəsində dünyada su qıtlığı böhranı baş verir. Bu böhran təbii olaraq ölkəmizdə də hiss olunur. Kür çayının suyu qurumaq üzrədir. Bunun da səbəbi su mənbələrinin azaldılması və torpaqdan səmərəli istifadə olunmamasıdır.
AZƏRTAC xəbər verir ki, bunu Milli Məclisin Aqrar siyasət komitəsinin sədri Tahir Rzayev komitənin martın 14-də keçirilən iclasında səsləndirib.
Komitə sədrinin sözlərinə görə, əkin sahələrinin sayının artması da su ehtiyatını azaldıb.
“Sudan qənaətlə istifadə olunmur. Prezident İlham Əliyevin də qeyd etdiyi kimi, əkin sahələrinin suvarılmasında çiləmə üsulundan istifadə olunmalıdır. Fərdi təsərrüfatlara üstünlük verilməsi ciddi çətinliklər yaradır. Əslində, iri təsərrüfatların yaradılması daha məqsədəuyğundur. Fərdlilik məhsulun yığılmasında da problemlər yaradır”, - deyə Tahir Rzayev vurğulayıb.
O, su qıtlığının qarşısının alınması üçün dövlətimizin qarşıya qoyduğu tapşırıqların yerinə yetirilməsinin vacibliyini qeyd edib.