Tanzaniyalı mühəndis: WUF13 urbanizasiya problemlərinin müzakirəsi üçün vacib platformadır
Bakı, 21 may, AZƏRTAC
Urbanizasiya xüsusilə inkişaf etməkdə olan ölkələr üçün əsas çağırışlardan biridir və bu problemlərin həlli üçün beynəlxalq əməkdaşlıq böyük əhəmiyyət daşıyır.
Bu fikri Tanzaniyanın İctimai İşlər və Nəqliyyat Nazirliyinin mühəndisi Paul Luhala Ümumdünya Şəhərsalma Forumunun 13-cü Sessiyası (WUF13) çərçivəsində AZƏRTAC-a açıqlamasında deyib.
O bildirib ki, WUF13 müxtəlif ölkələrdən olan iştirakçıları bir araya gətirərək, urbanizasiya ilə bağlı problemlərin müzakirəsinə imkan yaradır.
“Bu bizim üçün çox vacibdir. Xüsusilə Tanzaniya kimi inkişaf etməkdə olan ölkələr üçün urbanizasiya mühüm problemdir. Burada müxtəlif ölkələrdən olan insanlarla görüşür, problemlərin necə həll oluna biləcəyini müzakirə edirik”, - deyə o qeyd edib.
Paul Luhala vurğulayıb ki, Azərbaycana səfəri zamanı şəhərsalma sahəsində müsbət təcrübələrin şahidi olub.
“Bakıda infrastrukturun və yaşayış məntəqələrinin planlı şəkildə qurulduğunu gördüm. Bu ölkədən öyrənəcəyimiz çox şey var”, - deyə o əlavə edib.
Bölmənin digər xəbərləri
