TBİLİSİDƏ AZƏRBAYCAN VƏ GÜRCÜSTANIN DÖVLƏT BAYRAMLARI QEYD OLUNACAQDIR
Bakı, 19 may (AZƏRTAC). Mayın 27-də Gürcüstan Azərbaycanlıları Konqresi (GAK) 28 May - Azərbaycan Xalq Cümhuriyyəti yaradılmasının 92-ci ildönümünü və 26 May - Gürcüstanın Müstəqillik Günü münasibətilə tədbir keçirəcəkdir.
GAK-ın sədri Əli Babayev bildirmişdir ki, iki qardaş ölkənin dövlət bayramları münasibətilə keçiriləcək tədbirdə əvvəlcə Azərbaycanın ümummilli lideri Heydər Əliyevin büstünün və Gürcüstanın müstəqilliyi uğrunda həlak olanların xatirə abidəsi önünə əklil qoyulacaqdır.
Konqresin nümayəndələri, həmçinin Tbilisidə Nəbatat bağında Azərbaycanın görkəmli ziyalıları Mirzə Fətəli Axundzadə, Mirzə Şəfi Vazeh və Azərbaycan Xalq Cümhuriyyətinin yaradılmasında böyük xidmətləri olmuş Fətəli xan Xoyskinin məzarlarını ziyarət edəcəklər.
Bayram tədbirində xarici dövlətlərin Gürcüstandakı səfirliklərinin, beynəlxalq təşkilatların nümayəndələrinin, gürcü və azərbaycanlı ziyalıların, elm xadimlərinin iştirakı nəzərdə tutulmuşdur.
Mərasimin bədii hissəsində GAK-ın nəzdində fəaliyyət göstərən “Ceyran” rəqs ansamblı Azərbaycan və gürcü milli rəqslərini ifa edəcəkdir.
Bölmənin digər xəbərləri
