Tbilisidə Xocalı soyqırımının qurbanlarına həsr olunmuş sərgi təşkil edilib
Tbilisi, 26 fevral, AZƏRTAC
Tbilisi şəhərində yerləşən M.F.Axundzadə adına Azərbaycan Mədəniyyəti Muzeyində Xocalı soyqırımının 34-cü ildönümü ilə əlaqədar “Unutmadıq, Unutdurmarıq” adlı anım sərgisi təşkil olunub.
AZƏRTAC xəbər verir ki, sərgidə 1992-ci ilin fevralında baş vermiş faciə zamanı çəkilən real fotoşəkillər nümayiş etdirilib.
Tədbirdə Azərbaycanın Gürcüstandakı səfirliyinin nümayəndələri, SOCAR-ın dəstəyi ilə təhsil alan tələbələr, Gürcüstanda yaşayan azərbaycanlı icmasının üzvləri, ziyalılar və ictimaiyyət nümayəndələri iştirak ediblər.
Muzeyin elmi işçisi Leyla Əliyeva Xocalı faciəsi barədə ətraflı məlumat verib. Səfirliyin əməkdaşı Sənan Baxşıyev isə faciənin dünyada tanıdılması istiqamətində görülən işlər barədə danışıb.
Çıxışlarda vurğulanıb ki, Xocalı soyqırımı təkcə Azərbaycan xalqına qarşı deyil, bütövlükdə insanlığa qarşı törədilmiş ağır cinayətdir. Faciənin həqiqətlərinin beynəlxalq ictimaiyyətə çatdırılması və qurbanların xatirəsinin yaşadılması hər bir azərbaycanlının mənəvi borcudur.
Tədbir çərçivəsində iştirakçılar şəhidlərin xatirəsini ehtiramla yad edərək, tarixi yaddaşın qorunmasının vacibliyini qeyd ediblər.
Sonda Xocalı faciəsindən bəhs edən sənədli film nümayiş etdirilib.
Leyla Əliyeva jurnalistlərə açıqlamasında deyib ki, tədbirə əsasən tələbə gənclərin dəvət olunması faciə ilə bağlı həqiqətlərin gənc nəslə çatdırılması məqsədi daşıyır: “Düşünürük ki, bu yolla faciə barədə məlumatları həm də gələcək nəsillərə ötürə biləcəyik”.
Xətayi Əzizov
AZƏRTAC-ın xüsusi müxbiri
Tbilisi
Bölmənin digər xəbərləri
