QAN YADDAŞI
Tələbə Nicat Əliyev: Şəhidlərimiz tariximizə öz qanları ilə şanlı səhifə yazıblar
Bakı, 20 yanvar, AZƏRTAC
Vətənin azadlığı və müstəqilliyi uğrunda canından keçən şəhidlər heç vaxt unudulmayacaq. Çünki onlar Azərbaycan xalqının tarixinə öz qanları ilə şanlı səhifə yazıblar.
Bu sözləri AZƏRTAC-a tələbə Nicat Əliyev söyləyib.
O deyib ki, 1990-cı il yanvarın 19-dan 20-nə keçən gecə mərd oğul və qızlarımız əliyalın düşmən tanklarının, silahlarının qabağına çıxdılar. Çünki onlar üçün doğma Azərbaycanın, müqəddəs torpağın azadlığı və müstəqilliyi hər şeydən uca idi. Bu insanlar artıq sovet imperiyasının və onun yerdəki əlaltılarının boyunduruğu altında yaşamaq istəmirdilər. Bu isə mənfur düşmənlərin ürəyincə deyildi.
“Müqəddəs Quranda da yazıldığı kimi, ölümlərdən ən şərəflisi şəhid ölümüdür. Şəhidlik zirvəsinə ucalan insanlar bu gün şəhərin ən uca, səfalı yerində - Dağüstü parkda uyuyurlar. Şəhidlər xiyabanı xalqımızın and yeri, ziyarətgahıdır. Şəhidlərimizin xatirəsi xalqımızın qəlbində əbədi yaşayacaq”, – deyə N.Əliyev vurğulayıb.