“Təmiz Şəhər” ASC yeni onlayn layihələrini təqdim etmişdir
Bakı, 6 dekabr (AZƏRTAC). Əhalinin ekoloji maarifləndirilməsinə hər zaman böyük əhəmiyyət verən “Təmiz Şəhər” ASC tərəfindən onlayn layihələrə də geniş diqqət ayrılır.
Dekabrın 6-da “Təmiz Şəhər” ASC-nin rəsmi internet saytının (www.tamizshahar.az) yenilənmiş versiyasının və tullantıların azaldılmasına yönəldilmiş yeni saytının təqdimatı keçirilmişdir.
ASC-nin mətbuat xidmətindən AZƏRTAC-a bildirmişlər ki, tədbirdə İqtisadiyyat və Sənaye Nazirliyinin, Ekologiya və Təbii Sərvətlər Nazirliyinin, Bakı Şəhər İcra Hakimiyyətinin, eləcə də müxtəlif QHT-lərin nümayəndələri iştirak etmişlər.
Tədbirdə açıq informasiya siyasətinin “Təmiz Şəhər” ASC-nin prioritet istiqamətlərindən olduğu bildirilmiş və bu qurumun fəaliyyəti barədə məlumat verilmişdir.
ASC-nin İdarə Heyətinin sədri Zakir İbrahimov çıxış edərək yenilənmiş internet saytının qurumun fəaliyyəti barədə ictimaiyyətin daha dolğun və asan məlumatlandırılmasına xidmət edəcəyini diqqətə çatdırmışdır. Qeyd etmişdir ki, yeni saytın quruluşu və axtarış sistemi istifadəçilərin istədikləri informasiyanı daha rahat əldə etmələrinə imkan verəcəkdir.
Tədbir çərçivəsində tullantıların azaldılmasına yönəlmiş www.teb.az ünvanında yerləşən Təkrar Emal Birjasının (TEB) da təqdimatı keçirilmişdir. ASC-nin şöbə müdiri Oqtay Məmmədov demişdir ki, bu portal vasitəsilə istənilən şəxs təkrar emala yararlı xammalı satışa çıxararaq potensial müştərilərə təqdim edə bilər.
Qeyd edilmişdir ki, təkrar emal ilə məşğul olan sənaye şirkətlərinin rastlaşdığı başlıca problem xammal təchizatçılarının olmamasıdır. Bu məsələnin həlli istiqamətində atılan növbəti addım kimi “Təmiz Şəhər” ASC tərəfindən TEB-in elektron portalı yaradılmışdır.
Şöbə müdiri tullantıların çeşidlənməsi və təkrar emalının tullantıların ümumi həcminin azalmasına, ucuz xammal bazarının formalaşmasına, ölkədə təkrar emal işinin inkişafına zəmin yaratdığını diqqətə çatdırmış, prosesin tullantıların ətraf mühitə mənfi təsirinin azalması kimi üstünlüyünü xüsusi vurğulamışdır.
Tədbir iştirakçılara hazırlanmaqda olan www.tulantim.az internet səhifəsi haqqında da məlumat verilmişdir. Bildirilmişdir ki, portalın əsas məqsədi evlərimizdə olan və artıq istifadə etmədiyimiz, lakin kiminsə ehtiyacını ödəyə biləcək əşyaların tullantı kimi atılmasının qarşısını almaq, bu əşyaları digər istifadəçilərə təklif etməkdir. “Bir şəxs üçün lazımsız olan əşya, digəri üçün gərəkli ola bilər” şüarı altında hazırlanan portal həm tullantıların miqdarını azaltmağa, həm də əhalidə mübadilə mədəniyyətini inkişaf etdirməyə xidmət edəcəkdir.
Bölmənin digər xəbərləri
