Tərtərdə Xalq Cümhuriyyətinin 100 illiyi qeyd olunub
Tərtər, 28 may, Tahir Ağaməmmədov, AZƏRTAC
Azərbaycan Xalq Cümhuriyyətinin yaranmasının 100-cü ildönümü Tərtər rayonunda təntənə ilə qeyd edilib.
AZƏRTAC-ın bölgə müxbiri xəbər verir ki, mayın 28-də keçirilən ümumrayon tədbirinin iştirakçıları əvvəlcə Tərtər şəhərinin mərkəzi meydanında ulu öndər Heydər Əliyevin abidəsini ziyarət edərək, önünə tər gül-çiçək dəstələri qoyub, sonra Azərbaycan Xalq Cümhuriyyətinin 100 illiyinə həsr olunmuş kitab sərgisi ilə tanış olublar.
Mədəniyyət Mərkəzində davam edən tədbirdə rayon icra hakimiyyətinin başçısı Müstəqim Məmmədov məruzə ilə çıxış edərək, 1918-ci il mayın 28-də müsəlman Şərqində yaradılan ilk dünyəvi, demokratik respublika olan Azərbaycan Xalq Cümhuriyyətinin tarixi əhəmiyyətindən, gərgin və mürəkkəb ictimai-siyasi şəraitdə cəmi 23 aylıq fəaliyyəti dövründə qazandığı uğurlardan bəhs edib. Bildirilib ki, Prezident İlham Əliyevin 2017-ci il mayın 16-da imzaladığı “Azərbaycan Xalq Cümhuriyyətinin 100 illik yubileyi haqqında” Sərəncamı milli dövlətçilik tariximizə olan xüsusi diqqət və ehtiramın, milli kimliyimizə qayğının bariz nümunəsidir. Eləcə də, dövlətimizin başçısının 2018-ci ili ölkəmizdə “Azərbaycan Xalq Cümhuriyyəti İli” elan etməsi cümhuriyyət dövründə həyata keçirilmiş tədbirlərə yüksək dəyərin təcəssümüdür.
Diqqətə çatdırılıb ki, Azərbaycan 1991-ci ildə dövlət müstəqilliyini bərpa etdikdən sonra, xüsusən ulu öndər Heydər Əliyevin və Prezident İlham Əliyevin diqqət və qayğısı sayəsində cümhuriyyət dövrünün tədqiqi və təbliği istiqamətində mühüm addımlar atılıb. Azərbaycan Respublikası hazırda cümhuriyyət dövrünün demokratik dəyərlərinə sadiq qalaraq sürətlə inkişaf edir, dünya birliyində layiqli yer tutur.
Tədbirdə digər çıxış edənlər XX əsrin əvvəlindəki ictimai-siyasi vəziyyətdən, Azərbaycan Xalq Cümhuriyyətinin (AXC) fəaliyyəti və həyata keçirdiyi tədbirlərdən, dövlətçilik tariximizdə rolundan danışıblar. Bildirilib ki, 100 illiyini qürur hissi ilə qeyd etdiyimiz Azərbaycan Xalq Cümhuriyyətinin yaradılması xalqımızın milli azadlıq mübarizəsinin məntiqi yekunu idi.
Çıxışlardan sonra Azərbaycan Xalq Cümhuriyyətinin 100 illiyi münasibətilə keçirilən şahmat və intellektual yarışların qaliblərinə fəxri fərmanlar təqdim olunub.
Tədbir rayon Mədəniyyət Mərkəzinin özfəaliyyət kollektivinin və Uşaq-Gənclər İnkişaf Mərkəzinin yetirmələrinin hazırladığı konsert proqramı ilə başa çatıb.
Bölmənin digər xəbərləri
