Tramp: Nizamlanma prosesinin sonunda Krım Rusiyada qalacaq
Bakı, 25 aprel, AZƏRTAC
Ukrayna böhranının həllindən sonra Krım Rusiyanın tərkibində qalacaq.
AZƏRTAC xəbər verir ki, ABŞ Prezidenti Donald Tramp bunu "Time" jurnalına müsahibəsində deyib.
“Biz Krım haqqında danışmalıyıq. O, Rusiyanın tərkibində qalacaq. Ukrayna Prezidenti Volodimir Zelenski bunu başa düşür. Krım uzun müddətdir ki, Rusiyanın nəzarəti altındadır”, - deyə Donald Tramp bildirib.
Trampın sözlərinə görə, Ukrayna böhranını yalnız o həll edə bilər. O, eyni zamanda yaxın vaxtlarda tərəflər arasında razılığın əldə oluna biləcəyini vurğulayıb: “Biz razılaşmaya çox yaxınıq. Başqasının belə bir razılaşma əldə edə biləcəyinə inanmıram”, - deyə prezident əlavə edib.
Donald Tramp daha əvvəllər də bəyan etmişdi ki, Krım illər əvvəl itirilib və Volodimir Zelenskinin onu Rusiya ərazisi kimi tanımaqdan imtina etməsi ilə bağlı bəyanatları sülh danışıqlarına ziyan vurur.
Rusiya Prezidentinin mətbuat katibi Dmitri Peskov isə öz növbəsində qeyd edib ki, ABŞ Prezidentinin Krımla bağlı dedikləri Moskvanın bu məsələ ilə bağlı mövqeyinə tamamilə uyğundur.
Bölmənin digər xəbərləri
