TUNİSDƏ “LƏ FİQARO” QƏZETİNİN YAYIMINA QADAĞA QOYULMUŞDUR

21.09.2006 [13:05]
Çap et
A⁺ A^-

AZƏRTAC-ın xüsusi müxbiri Frans Press agentliyinə istinadən xəbər verir ki, Tunisdə Fransanın nüfuzlu gündəlik “Lə Fiqaro” qəzetinin yayımına qadağa qoyulmuşdur. Buna səbəb qəzetdə İslamı təhqir edən məqalənin dərc olunmasıdır.

Qəzetin 19 sentyabr tarixli nömrəsində dərc edilmiş “İslam qorxusu ilə üzbəüz azad dünya nə etməlidir?” adlı məqalədə müqəddəs peyğəmbəri, İslam dinini və müsəlmanları təhqir edən fikirlər səsləndiyinə görə ölkənin daxili işlər naziri onun satışına qadağa qoymuşdur. Nazirin qadağasından sonra qəzetin nüsxələri köşklərdən yığışdırılmışdır.

Müəllif Rober Redeker məqaləsində Qərbin müsəlman ölkəsinin heç birində olmayan azad fikir və söz azadlığı üçün İslamın təhlükə törətdiyini bildirmişdir.

R.Redeker məqaləsində Quranı “görünməmiş zorakılıq kitabı” və Məhəmməd peyğəmbəri “zalım müharibənin rəhbəri” adlandırmışdır.