Turizm və Menecment Universitetində mühazirə: “Cümhuriyyətin Azərbaycan uğrunda mübarizəsi”
Bakı, 1 mart, AZƏRTAC
Martın 1-də Azərbaycan Turizm və Menecment Universitetinin (ATMU) tələbələri üçün “Şirvanşahlar Sarayı Kompleksi” Dövlət Tarixi-Memarlıq Qoruq-Muzeyinin əməkdaşları tərəfindən “Cümhuriyyətin Azərbaycan uğrunda mübarizəsi” mövzusunda mühazirə saatı təşkil olunub.
ATMU-dan AZƏRTAC-a bildirilib ki, Azərbaycan Xalq Cümhuriyyətinin (AXC) yaranmasının 100 illiyi ilə əlaqədar keçirilən tədbirdə 1918-ci il mayın 28-də müsəlman Şərqində ilk parlamentli respublika olan AXC-nin qurulduğu vurğulanıb. Diqqətə çatdırılıb ki, cəmi 23 ay yaşamasına baxmayaraq AXC zəngin dövlət quruculuğu təcrübəsi ilə milli dövlətçilik tariximizdə silinməz izlər qoyub. Xalqın qəlbində azadlıq və istiqlal duyğularını gücləndirməklə respublikanın gələcək müstəqilliyi üçün etibarlı zəmin yaradıb.
Məruzələrdə diqqətə çatdırılıb ki, AXC-nin iqtisadi platformasında mülkiyyət plüralizmi - dövlət mülkiyyəti, xüsusi, şəxsi, səhmdar, bələdiyyə mülkiyyəti və onun digər formalarının inkişafı üçün bərabər imkanlar yaradılması nəzərdə tutulub. Hökumət həm əvvəlki dövrdən miras qalan, həm də respublikanın mövcudluğu dövründə baş verən inflyasiyaya qarşı mübarizə aparmalı olub. Bu məqsədlə müstəqil dövlətin maliyyə, vergi, bank-kredit sistemi yaradılıb. Belə ki, 1919-cu ilin sentyabrında Cümhuriyyətin Dövlət Bankı fəaliyyətə başlayıb. AXC xalqımızın tarixində, siyasi və mənəvi-psixoloji həyatında, o cümlədən dövrün ədəbi-bədii fikir nümunələrində silinməz izlər buraxıb.
Vurğulanıb ki, Cümhuriyyət dövründə Bakı, Gəncə, Şuşa, Tiflis, İrəvan və digər mədəni-inzibati mərkəzlərdə təkcə Azərbaycan-türk dilində deyil, rus, gürcü, polyak, fars, alman və qeyri dillərdə çap olunan qəzet və jurnallarda təhsil, elm, maarif və mədəniyyətin inkişafına, milli ruhlu yeni nəslin yetişdirilməsinə, eyni zamanda, ölkədə baş verən ictimai-iqtisadi, siyasi hadisələrə dair məqalələr dərc edilib.
“İçərişəhər” Dövlət Tarix-Memarlıq Qoruğu İdarəsinin Elmi-Mədəni Mərkəzinin baş elmi işçisi Qənirə Pirquliyeva məruzəsində bildirib ki, Prezident İlham Əliyevin “Azərbaycan Xalq Cümhuriyyətinin 100 illik yubileyi haqqında” 2017-ci il 16 may tarixli Sərəncamı müasir müstəqil Azərbaycan Respublikasının AXC-nin varisi olduğunu təsdiqləyib.
Bölmənin digər xəbərləri
