Türk Dövlətləri Təşkilatı hazırda özünün qızıl dövrünü yaşayır - ŞƏRH
Bakı, 29 noyabr, AZƏRTAC
Yeni dünya nizamında bir sıra təşkilatların qeyri-effektiv fəaliyyəti səbəbindən onların siyasi səhnədə və ictimai sferada nüfuzunun aşağı düşdüyünün şahidi oluruq. Bu hal üzv dövlətlər arasında dərin çatlara və fikir ayrılıqlarına səbəb olur, ticarət dövriyyəsinə və xalqlararası münasibətlərə mənfi təsir göstərir. Hətta keçirilən toplantılar zamanı ritorikada və addımlarda xoşagəlməz hallar nümayişkaranə şəkildə özünü göstərir. Bu reallıqlar fonunda demək olar ki, azsaylı təşkilatlar siyasi meydanda daha da güclənir və parlayır. Şübhəsiz ki, Türk Dövlətləri Təşkilatı (TDT) məhz belə qurumların sırasında öndə dayanır. Buna təsir göstərən əsas amillərdən biri dövlətlər və liderlər arasında münasibətlərin yüksək səviyyədə olması, digər tərəfdən isə cəmiyyətlərin bir-birinə səmimi tellərlə bağlılığıdır. Bu, təbii cazibə qüvvəsidir.
Türk Dövlətləri Təşkilatının getdikcə daha da institusionallaşmasının şahidi oluruq və bu proses TDT-nin fəaliyyət istiqamətlərini daha sistemli formaya salır.
Bu sözləri AZƏRTAC-a açıqlamasında Milli Məclisin deputatı Azər Badamov söyləyib.
O bildirib ki, noyabrın 24-də Bakıda Türk Dövlətləri Təşkilatına üzv ölkələrin qeyri-hökumət təşkilatlarının həmrəylik forumu keçirildi. Forum iştirakçılarına Azərbaycan Prezidenti İlham Əliyevin mövcud reallıqlar fonunda çağırış və tövsiyələrini əks etdirən müraciəti ünvanlandı: "Forumun önəmi və dövlətimizin başçısının müraciətində səsləndirilən mühüm məqamlara keçmədən əvvəl onu da qeyd etməliyik ki, noyabrın 19-da Bakı Türk Dövlətləri Təşkilatının XI Zirvə Görüşündə təsdiq edilmiş Türk Qızıl Aypara Şəbəkəsinin yüksəksəviyyəli toplantısına da ev sahibliyi etdi. Türk Qızıl Aypara Şəbəkəsinə Azərbaycan, Türkiyə, Özbəkistan, Qazaxıstan və Qırğızıstanın milli cəmiyyətləri daxildir. Türkmənistan və Şimali Kipr Qızıl Aypara cəmiyyətləri tədbirdə müşahidəçi qismində iştirak etdilər. Bu fakt onu göstərir ki, artıq TDT strateji istiqamətlər müəyyənləşdirə, humanitar sahədə əməkdaşlığı genişləndirə və konkret fəaliyyət planı ortaya qoya biləcək səviyyəyə çatıb. “Qırmızı Şəbəkə” platformasının təsis olunması da həmin istiqamətlərin tərkib hissəsidir. Deməli cəmiyyətlər arasında əlaqələr həqiqətən dərinləşir, Təşkilat birgə təşəbbüslər üçün strateji çərçivə formalaşdırır.
Bu baxımdan TDT-yə üzv ölkələrin qeyri-hökumət təşkilatlarının ilk həmrəylik forumunun keçirilməsi olduqca önəmli addımdır. Dövlətimizin başçısının qeyd etdiyi kimi, qarşımıza daha iddialı məqsədlər qoyulmalıdır və bunun üçün türk dövlətlərinin hərtərəfli potensialı mövcuddur. Prezident İlham Əliyevin Türk dünyasını “ailəmiz” kimi xarakterizə etməsi təşkilatın ümumi iş prinsipinə ciddi müsbət təsir göstərib, güclü təkan verib".
Deputat əlavə edib ki, bizi köklərimiz, tariximiz, dilimiz, mədəniyyətimiz, ənənələrimiz və dəyərlərimiz daha da möhkəm birləşdirir. TDT üzv dövlətləri müəyyənləşdirdikləri gündəlikdə sülhə, təhlükəsizliyə və inkişafa fokuslanıblar.
Bu gün TDT vahid güc mərkəzi kimi çıxış edir. Vətəndaş cəmiyyəti təsisatları arasında ictimai kommunikasiyanın gücləndirilməsi münasibətlərin daha da dayanıqlı olmasına gətirib çıxaracaq. Fəaliyyət istiqamətlərimiz genişdir. Qeyd edilən iki önəmli tədbirlə yanaşı, TDT-nin media və informasiya üzrə məsul nazirlərinin və yüksəkvəzifəli rəsmilərinin toplantısı da yalnız təşkilat daxilində və regionda deyil, dünyada gedən proseslərə obyektiv qiymət verilməsi baxımından mühüm əhəmiyyət kəsb edir. Türk Dövlətləri Təşkilatının fəaliyyətinə təkan verən amillərdən biri də Azərbaycanın əldə etdiyi tarixi Zəfərdir. Məhz bu Zəfər Təşkilatın bütün fəaliyyət sahələrinə stimul verir. Zəngəzur dəhlizinin açılması ilə isə münasibətlərimiz tamamilə yeni bir mərhələyə qədəm qoyacaq. Dövlətimizin başçısının müraciətində diqqət çəkən məqamlardan biri də ondan ibarət idi ki, bir sıra çağırışlar edildi, qarşıda məsuliyyət formalaşdırıldı və tövsiyələr təqdim olundu. Türk dünyası QHT-lərinin BMT və digər beynəlxalq təşkilatlar çərçivəsində birgə, koordinasiyalı fəaliyyət göstərməsi və vahid platformada birləşməsi çağırışı da vacib istiqamətlərdən biridir. Bu, sadəcə, Təşkilat daxilində deyil, qlobal səviyyədə də birgə işin zəruriliyini göstərir.
QHT-lər tarix, mədəniyyət, ekologiya, iqlim siyasəti və digər sahələr üzrə ortaq qrant müsabiqələri keçirməli, layihələri dəstəkləməli və qarşılıqlı ünsiyyəti gücləndirməlidirlər. Mədəni inteqrasiya ilə bağlı məsələlərin tamamlanması müasir çağırışlar fonunda dəyərlərimizin qorunması baxımından xüsusi əhəmiyyət daşıyır. Gələcəkdə həyata keçirilən layihələr, çoxtərəfli tərəfdaşlıq formatları, dövlətlərarası əməkdaşlıqla yanaşı, humanitar koordinasiya da gücləndirilməlidir”, - deyə deputat əlavə edib.
Deputatın sözlərinə görə, TDT uzunmüddətli hədəflər və prioritet fəaliyyət istiqamətləri müəyyənləşdirib. Bu istiqamətdə keçirilən hər görüş və toplantı birgə öhdəliklərin müzakirəsi baxımından mühüm əhəmiyyət kəsb edir: “Təşkilat yeni çağırışlara hazır olmalıdır. Ərzaq təhlükəsizliyi, iqlim dəyişiklikləri, innovativ inkişaf, rəqəmsallaşma və kibertəhlükəsizlik kimi çağırışlara qarşı müştərək fəaliyyət göstərilərək cavab verilməlidir. Tematik istiqamətlər üzrə fəaliyyət planları hazırlanmalı və dövlətlərlə yanaşı, cəmiyyətlərin inteqrasiyası barədə fikir mübadilələri mütəmadi aparılmalıdır. Bütövlükdə, Türk Dövlətləri Təşkilatı hazırda özünün qızıl dövrünü yaşayır”.
Bölmənin digər xəbərləri
