TÜRKİYƏ KİPR MƏSƏLƏSİNDƏ GÜZƏŞTƏ GETMƏK NİYYƏTİNDƏ DEYİLDİR
Türkiyə Kipr probleminin həlli məsələsində güzəştə getmək niyyətində deyildir və bu problemi özünün Avropa İttifaqına tamhüquqlu üzv kimi qəbul olunması ilə əlaqələndirilməsinə etiraz edir. AZƏRTAC “Novosti” agentliyinə istinadla xəbər verir ki, bunu Türkiyənin Baş naziri Rəcəb Tayyib Ərdoğan iyulun 20-də Şimali Kiprdə Türkiyə qoşunlarının adaya çıxarılmasının 32-ci ildönümünə həsr olunmuş mərasimdə bildirmişdir. O demişdir: “Kipr problemi hərtərəfli həll olunanadək bütün məhdudiyyətləri aradan qaldırmağı təklif edirik. Şimali Kiprin üzərinə qoyulan ədalətsiz qadağanı götürmək lazımdır. Türkiyə həmişə Şimali Kiprin tərəfində olmuş və bundan sonra da olacaqdır”.
Türkiyənin Baş naziri demişdir ki, Kipr məsələsini BMT-nin himayəsi altında həll etmək lazımdır. Türkiyə rəhbərliyi əvvəllər də dəfələrlə bildirmişdir ki, Şimali Kiprin beynəlxalq aləmdə təklənməsinin qarşısı alınmayınca adadakı limanlarını açmayacaq və Avropa İttifaqı ilə danışıqların bu səbəbdən pozulmasına görə məsuliyyət daşımayacaqdır.
Bölmənin digər xəbərləri
